SHILLONG Naiwieng 11: Hadien katto katne por ba la mih ka jingdawa kaba jur na ka por sha ka por ban pynkha thymmai sa kawei ka Constituency MDC na Ri Bhoi kata ia ka Umsning, nalor ki saw tylli ki constutuency kiba la don lypa na ka bynta ka MDC ban pyniaryngkat bad ki constuency MLA ba la pykha dang shen kata sha ka 5 tylli na ka liang u CEM ka KHADC u Bah Pynshngaiñ N Syiem, ha ka jingiakynduh bad ia phylliew jigmut bad ki nongialam ka Ri-Bhoi Youth Development & Social Organisation (RBYDSO), ki rangbah shnong bad kiwei kiwei ki riew pawkhmat u la kular ba yn sa thaw noh da ka Committee ban khmih ban bishar bniah ha kaba iadei bad kane ka jingdawa pynkha MDC constituency ba thymmai ia ka Umsing ka ban kynjoh sha ka 5 tylli kumba long mynta ki constituency MLA.
Kane ka jingdawa ka la long ruh ba hadien ba la mih ka jingiakren ba ka KHADC ka la pynsahteng ia ka kam phiah Constituency naduh u snem 2008, mynba u Bah Cleophas Ban Syiem, MDC barim ka Nongpoh u dang bat kum u CEM jong ka ha utei u snem.Dei ha ka por jong u Bah Syiem kum u CEM ba ka KHADC ka la don jingthmu ban phiah thymmai noh sa kawei pat ka seat kyrpang na ka bynta ka MDC ha Ri-Bhoi District kumba long ka MLA seat, ia kaba yn tip kum ka Umsning Constituency.
Na ka liang u President ka RBYDSO, u Bah Dibishon Malai, u la ong ba u CEM u la pyntip ia ngi, ba ka KHADC ka ladep thaw ia ka Select Committee ban bishar halor kane ka jingdawa u paidbah ka Umsning Constituency hadien ba kane ka kam ka la shu sahteng hapoh ka KHADC naduh u snem 2008, haba kren sha ki nongthoh khubor.
Ha kane ka jingleit kynduh jong katei ka seng ryngkat bad ka jingsnohkti lang ki Rangbah Shnong ka Ri-Bhoi District kiba don hapoh ka Umsning Constituency, ia u CEM ba mynta ka KHADC, u Bah Pynshngaiñ N Syiem, u Bah Malai u la ong ba “u CEM u kwah ban ioh shwa ia ka jingpynsngew na baroh ki MDC hadien ba ka Select Committee ka la dep ban ai ia ka kaiphod bad kane ka jingdawa kam dei tang jong ka seng, hynrei ka dei hi ka jingkwah u paidbah bad ngi kyntu ia ka KHADC ban kham pynstet halor kane.”
Kane ka seng ka la aiti ruh ia ka dorkhas sha u CEM ban pyntip ba kane ka jingdawa ka dei ruh kaba la wanrah ha ka por ba u Bah C.B Syiem, u dang long u CEM ka KHADC. Ia mynta ka Ri-Bhoi kaba don 5 tylli ki MLA Constituency hynrei ka don pat tang 4 tylli ki MDC Constituency. Katba na ka liang u Bah Pynshngaiñ N Syiem, CEM ka KHADC u la ong “ngi kwah ba ka Khasi Hills Autonomous District Council kan don lang ia ki Constituency kumba long ha ki MLA Constituency.”(SP News)
