Smit, August 08: Ka Dorbar kaba la khot da ka Synjuk ki Khlieh 
Nongsynshar, thain Mawkynrew Block ka la long mynta ka sngi, hapoh Iing Dorbar Hall Nongmadan Smit, Hima Khyrim, kynthup ruh ia ki katto katne ngut ki Rangbah Shnong, Sordar Shnong jong ka thian Mawryngkneng bad Mylliem Block, ban ia kren halor ka AIN SHNONG – ba la khreh ban pynjari da ka KHADC Village Administration Bill 2013. Ia katei ka Dorbar la pyniaid da u Bah Tyngkai Mynsong, President Ka Synjuk Khlieh Nongsynshar Mawkynrew.
Ka Synjuk Ki Khlieh Nongsynshar Shnong, thain Sohra ki la khot sngewbha ia u Bah John F Kharshiing, Chairman, Co-Chairman, Meghalaya State Planning Board; Chairman, Grand Council of Chiefs of Meghalaya, & Spokesperson, Federation of Khasi States, ban iarap pynshai halor katei ka Ain Shnong kaba la tyrwa da ki bor KHADC bad kaba la tip kum ka KHADC Village Admin Bill 2013.
Ka Synjuk Ki Khlieh Nongsynshar Shnong, thain Mawkynrew, ki la khot lang ia u Bah John F Kharshiing, Chairman, Co-Chairman, Meghalaya State Planning Board; Chairman, Grand Council of Chiefs of Meghalaya, & Spokesperson, Federation of Khasi States, ban iarap pynshai halor katei ka Ain Shnong kaba la tyrwa da ki bor KHADC bad kaba la tip kum ka KHADC Village Admin Bill 2013, ka ain Meghalaya Town & Country Bye-Law, bad kiwei kiwei ki Ain.
Na ka liang u Bah John F Kharshiing, Chairman, Ka Dorbar Ki Khlieh Nongsynshar Ka Ri Hynniewtrep, u la pynshai ba ka por ka la dawa kyrkieh ia ha kaba ka Sorkar India bad ka Parliament jong ka Ri India ka dei ban kit khlieh ban pynpaw ia ki dulir IOA & AA hapoh ka Constitution Ri India.
U la wer bad khot sngewbha ia ki Nongsynshar Shnong, Raid bad Hima, ban ia poi ryntih sha ka jingialang ka ban long 13 tarik August 2013, ha Mawkhar, Shillong, ha kaba yn pynlong ia ka jingiakynduh kyrpang ban kynmaw ia ka jingdap 65 snem ka jingmynjur ka Sorkar India ia ki dulir Instrument of Accession and Annexed Agreement ha kaba kaba la soi bad pdiang da ka Sorkar India ha u bnai August 1948.
Shuh shuh u la ong ba ha ka jingiakynduh lang 13 August 2013, ha Mawkhar, Shillong, un sa sei ia ka shithi kyrpang ba dang shu lap na ki jingbuddien kaba la bun snem kaba la thoh da u Prime Minister ba nyngkong ka Ri India u (Late) Jawaharlal Nehru ha u snem 1947, halor ki kam kiba iadei bad ka Federation of Khasi States.
Hadien ka jingiatai kaba sani bha ka Synjuk Ki Khlieh Nongsynshar, Mawkynrew, ki la rai ban kyntu jur ia kibor KHADC ba ki dei pynbeit bha ia ka tei ka Ain ha kaba la dei ban thoh shai ba u Rangbah Shnong, lane u Sordar Shnong un long u nongpyniaid ia ka Village Dev Council, ym ban pynmih ar tylli ki bor hapoh kawei ka Shnong. ioh ba kan ialam sha ka jingiapait ia pra hapoh ki Shnong, bad kaba kham sniew ka long ba kan wanrah ia ka jingiasngew liang hapoh ki Shnong ki thaw.
Ha kaba iadei bad katei ka phang, ka Synjuk ki Khlieh Nongsynshar Shnong, thain Mawkynrew, ki rai ban ia kynduh biang bad u Bah Kynsai M Syiem, Sordar Smit, ban pynlong ia ka jingiakynduh lang jong baroh ki Khlieh Nongsynshar Shnong hapoh ka Hima Khyrim, khnang ban ioh lad ban ia kren biang halor ki ain KHADC Administration of Justice Rules 1953, Ka RTI Act 2005, ka Meghalaya Town & Country Planning Bye-Law bad kiwei kiwei ki ain kiba lah ban ktah ia ki bor Dorbar Shnong.(SP News)
