Shillong, Naitung 30: Ki samla wad kam hapoh ka Synjuk “Association of Qualified Grade-IV, 2011 East Khasi Hills District”, kala ai por hapoh 5 tarik u Nailar 2013 ia ka tnad Directorate of Health Services (DHS) ban kyndang noh ia kito kiba la shu thung kam sop sop hapoh katei ka tnad.
“Ha ka jingbuddien jong ka Synjuk ia ka RTI kaba la ioh lyngba ka tnad ka koit ka khiah (Health Department), kiba kynthup naduh Civil Hospital, Ganesh Das Hospital, DMHO, DMO, bad RP Chest Hospital, Shillong, la lap ba ki don palat 100 tylli tam eiei ki kam Grade-IV kiba la shu thung kam narieh narieh (backdoor system),” ong u Secretary, samla Skhemborlang Pyngrope ha ka kyrwoh.
U samla Skhemborlang, u la ong ruh na ka liang ka Synjuk mar ia ioh jingtip lyngba ka RTI halor kane ka bynta, ki la leit ban ia kynduh ia ki ophisar bapher bapher jong ka tnad ka koit ka khiah, ha kaba ki la phah leit ia kynduh ia ka Director jong ka Health Services.
“Ngi la leit ban ia kynduh ia ka Director jong ka Health Services, hynrei ka la kyntait ban ong eiei halor kane ka bynta, pynban ka la phah ban leit ia kynduh ia ki Ophisar ba heh jong ka Health Department,” la ong u samla Skhemborlang.
Ha ka jingiakynduh ia u Secretary bad u Commissioner Secretary jong ka Health Department, ki la kren shai ba ia kane ka kam ka shong ha ka Director namar katkum ki kyndon ia ka kam (post) Grade-IV ka bor thung kam thung jam ka dei ka Director of Health Services (MI), la bynrap u samla Skhemborlang.
“Ha kaba iadei ba kane ka bynta, na ka liang ka Synjuk, ka la phah biang kawei ka shithi halor kane ka bynta sha ka Director ba kan leh eiei mardor hapoh 5 tarik u Nailar 2013. Lada ka Director kam leh eiei hapoh katei ka tarik, ka Synjuk kan shim noh da kiwei pat ki lad ki lynti ban pynbor ia ka Sorkar ba kan leh eiei halor kane ka bynta,” la ong ki nongialam ka Synjuk.
Ban shu pynkynmaw, dang shen ka Synjuk, ka la pyrshah jur ia ka jingthung kam pura da u Director of Health Services (MI) bad ka Joint Director of Health Services (SS), Civil Hospital, Shillong, ia 49 ngut ki briew ha kajuh sngi ba ki rung kam tang shipor (temporary/officiate) ha Civil Hospital, Shillong, bad dawa ban weng noh mardor bad dei ban thung da kiba la pyndep ia ka eksamin na DSC.
Ki nongialam ka Synjuk, ki la iathuh ruh, tang kum kawei ka nuksa ha ka kopi RTI ba la ioh na Civil Hospital, Shillong, la shem ha ka 1.8.2012 la thung kam shipor ia uwei u briew ha ka kam Grade-IV (Officiate for a period of 2 (two) months against the vacant post with a break of 3 (three) days), khlem da pyndep ia ka eksamin wad kam na ka DSC, hynrei ha ka shithi sha ka DSC la kdew ‘Date of regularization’ 1.8.2012 ia ujuh u briew. (SP News)
