Shillong Nohprah 03: Ka Employment and Generation Cell jong ka Khasi Students Union (KSU) sengkmie kala pynpaw ia ka jingsngewkhia halor ka jingbym thungkam ka sorkar jylla ia ki samla kiba la pass ia ka Grade IV ha kino kino ki tnad sorkar.
Kane ka Cell kala pynpaw ruh ba man la ka por ka sorkar kala shu pynbang ia ki ban thungkam hynrei haduh mynta kam pat lah satia ban thungkam ia ki bad kane kadei ka jingdkoh ha kaban weng ia ka kyrduh kam kyrduh jam haba ki samla kila leh bha ban pass ia ka eksam bad ia ka “Personal Interview” hynrei ha kaba kut hi la shu pynmih tang ka ‘list’ katba kiba bun hi kim shym la shah thungkam katba la don pat ka jingthungkam sop sop bad kane kala pynduh jingkyrmen shi katdei ia ki samla wadkam wadjam kiba khmih lynti ban shah thung ha kano kano ka tnad sorkar.
Kane ka tnad jong ka KSU kala pynpaw ruh ia ka jinglynnog ba ki tnad sorkar kiba dang lait kam kim shym la pynrungkam ia kine ki samla kiba la pass, imat ka don kaei kaei sha lyndet bad ka jingpyn rung kam tuh na shadien ne ‘Back Door appointment’. Ka jingthungkam ha kano kano ka tnad kadei ban long beit ha ka lynti kaba khuid kaba suba bad dei ban jied da ki samla kiba dei hok ban ioh.
Ka Manifesto jong ka Congress ha ka elekshon kaba la dep kala kular ban aikam ia shi lak ngut ki samla ka jylla hynrei kaba lyngngoh ka long ba tang ia kine ki samla kiba la pass ia ka eksam ruh haduh mynta kam shym la lah satia ban pynrungkam ia ki, ka Employment and Generation Cell jong ka KSU ka buh ia ka jingkylli shaei ka jah kane ka jingkular.
Ki samla kiba la pass la ka long ha kano kano ka kyrdan ne ha kano kano ka tnad sorkar kidei ban ioh iala ka hok kumba ma ki kila pyndep bad kito ki bym shym la leh ia ka eksam kin shah thungkam sop sop ne shah thung ha ki heh ki hain bad dei ban wengkam noh ia kine kiba la shu thungkam sop sop bad dei ban pynrungkam da kito ki samla kiba la trei shitom kiba la pass lyngba ka “Interview”.
Ka seng ka pynrem jur ia ka jingleh ka sorkar namar ba ki samla kiba la trei shitom kiba la pass ia ka eksam bad pass ia ka interview ki dei hok ban iohkam kim shym la shah thungkam ha ki tnad sorkar hynrei ki hap ban mih surok ban shah thngan bad ka jingkylli kaba ka seng ka buh, ka long shaei ka sorkar ka kwah ban ialam ia ki samla wadkam wadjam bad kane ka pynpaw ba ioh lehse kan poi sha u pud ban ialam bakla ia ki samla khlem kam khlem jam namar ka sorkar kam shym la peit ne shimkhia ia kine ki samla kiba la pass ia ki eksam bapher bapher kiba la pynlong da ka MPSC ne DSC.(SP News)
