Shillong, Nailar, 05: Ka jingbym don doktor ha Mawlasnai PHC ka la buh jingeh ia ki paidbah ka thaiñ Mawlasnai kiba ju shahniah beit ha kane ka jaka ai jingsumar haba ki iakynduh ia ka jingpang jingshitom.
Ka CSWO Central Body, hapoh ka jingialam jong i Kong Christabel Wanniang, General Secretary ka Seng ka la pynlong ka jingleit jurip ia kane ka jaka ai jingsumar ha kaba la lap ba ia ki nongpang la shu peit malu mala da ka wei ka ANM.
Kane ka nongialam ka Seng ka la iathuh ba ha ka jingleit jurip, haba pyrshang ban tohkit na ki nongtrei ka PHC ki iathuh ba u Dr. A. Kharnaior uba ju shakri ha kane ka Hospital u la leit pule pyntbit shuh shuh ialade bad mynta la jan shitaiew kane ka Hospital kam don doktor satia. La iathuh ba une u doktor un shym wan shimti shuh ia ka kam ban shakri ha kane ka jaka ai jingsumar namar ba ki bor bahalor ki la pyllait noh ia u na ka bynta ban leit pule pyntbit shuh shuh ialade.
Kum ban shu kdew hangne, kane ka PHC ka dei ruh kaba ai jingshakri kumba saw phew tylli ki shnong kata kiba kynthup ha ka Raid Nongtung bad wat ia ki shnong kiba don ha khappud bad ka Jylla Assam.
“Ngi sngewdei ban kyntu ia ki bor bahalor ka ophis u DM&HO ban phah noh syndon arngut ki doktor ban shakri ia ki nongpang ha kane ka PHC namar tang uwei u doktor kan buh jingeh ban ai jingshakri ia ki paidbah,” ong i Kong Wanniang.(SP News)
