Shillong, Kyllalyngkot 24: Hadien ba ioh pule bad ioh jingtip halor ka Ain kaba bhah kyrpang ia ka Mang Tyngka ia ki jaidbynriew Schedule Caste bad Schedule Tribes da ka Sorkar Jylla Karnataka u Bah John F Kharshiing, Co-Chairman, Meghalaya State Planning Board, Chairman, The Grand Council of Chiefs of Meghalaya, bad Spokesperson, Federation of Khasi States, u la pynlong ka jingiasyllok mynta ka 24 tarik January 2014, ha nongbah Bangalore bad ki officer jong ka Karnataka State Planning Board, ha katei ka jingiakren ki officer jong ka KSPB ki la pynbeit ia ka jingiakynduh bad ki khraw pyrkhat bad ki kynhun treimon sngewbha jong ka jylla Karnataka kiba la pynpaw ia ka kloi ka jong ki ban ai jingmut ia ka Sorkar jylla Meghalaya, ki Autonomous District Councils, bad ki Dorbar synshar tynrai.
Ha katei ka jingialang la ia kren halor ka Karnataka Schedule Castes Sub-Plan and Tribal Sub-Plan (Planning, Allocation and Utilisation of Financial Resources) Act 2013. Ka thong jong kane ka Act ka long kumno ban pyntikna ba ka bhah kaba dei na ka bynta ki jaidbynriew rit paid kan long kaba la bhah lupa ha ka Mang Tyngka jong ka jylla (State Plan Outlay), bad ha katei ka Act 2013 ka buh ruh ia ka kyndon ban pynshitom ia kino kino ki officer kiba pynkhien ia ki kyndon, ki rule jong katei ka Act, kum shibynta ban rah ia ka roi ka par jong ki riewlum. Ha kane ka jingialang la ia kren ruh halor kiba bun ki kam kiba ka Sorkar Jylla Karnataka ki la leh bad ia kaba ka jylla Meghalaya bad ki Autonomous District Councils bad ki Dorbar ki lah ban peit bad shim ia kaba ki sngewdei ban pyndonkam hapoh ka jylla Meghalaya. Hadien ba ki la ioh sngew ia ki jingbatai jong u Bah John F Kharshiing, Co-Chairman, MSPB, halor ka jingeh bun sien kaba mih hapdeng ka mang tyngka ki Sorkar Jylla sha ki ADC hapoh North East ki riewpyrkhat jong ka jylla Karnataka ki la ai jingmut ban pule bniah ia katei ka Act bad ban pynbeit thymmai khnang ba kan wanrah ia ka jingiaid beit ha kaba mang ia ka bhah tyngka hapdeng ka Sorkar Jylla bad ki lai tylli ki Autonomous District Council.
Ki la batai ha ka jingialang ba katkum ka khana samari jong ka jylla Karnataka ka jylla jong ki ka don 30 tylli ki District bad kumba 176 tylli ki Taluks (C&RD Block) bad ka jingdon paid ka long kumba 6.11 Crore bad na katei 17.5 % ki dei ki Scheduled Caste bad kumba 6.5 % ki Scheduled Tribes. Ki la pyntip ba ka jylla Karnataka ka don saw tylli ki National Park bad baroh saw ki don kumba 2250 square kilometer ka jingheh. Hynrei ha kawei ka liang ki la ong ba tang 17 % jong ka area ka jylla Karnataka ki dei ki jaka ba don Khlaw, bad ki dang iai trei shitom ban beh ia ka National Target ban pynneh bad sumar 33%.
Shuh shuh u Bah John F Kharshiing, Co-Chairman, MSPB u la kyndit ban tip ba hapoh ka jylla Karnataka ba 71% na ki kali baroh hapoh ka jylla Karnataka ki dei ki kali ar shaka ba la pyndonkam ki paidbah namar ka jingduna than ki kali kamai paidbah sha ki thain kyndong.
Ki officer Sorkar ki la pyntip ruh halor ka jingtreikam jong ka Karnataka Guarantee of Services to Citizens Act 2011 kaba la iarap shibun ia ka paidbah ban ioh jingtip lyngba ki kor Mobile bad ki kor Internet halor ki jingud jong ki paidbah, bad halor ki kam bapher bapher jong ka Sorkar Jylla Karnataka bad kane ka Ain ka don ki kyndon ban pynshitom ia kiba iaid pyrshah ia ki kyndon jong ka Act. Na ka liang u Co-Chairman, MSPB u la rai ban rah ia kitei ki jingtip sha ka MSPB ban phah sha ka Sorkar Jylla Meghalaya khnang ba kin ioh ban khmih bniah ia ki jingmyntoi jong kitei ki Ain kiba iarap shibun ia ki paidbah.
Ha katei ka jingialang la ia kren ruh kumno ban lum lang ia ki jaidbynriew riewlum ha kawei ka rynsan khnang ban ioh ban pynsngew bad pynsawa ia ki jingeh jong ki jaidbynriew riewlum bapher bapher.
Ha katei ka jingialang la ia donlang ka Smt. B Chaudhuri, IES, Additional Secretary, KSPB, u Dr S Madheswaran, Adviser, Planning Program Monitoring & Statistics Department, Govt of Karnataka, u Dr Balasubramaniam, MBBS, M.Phil, MPA(Harvard), na ka kynhun GRAAM, ka Dr. Rajeswari Kasturi, ISS, Deputy Adviser and Faculty, Fiscal Policy Institute, Govt of Karnataka bad kiwei kiwei ki heh Sorkar.(SP News)
