Shillong, Kyllalyngkot 09: Kum shibynta ban buddien ia ki jingeh ki jingmyntoi na ka MGNREGS bad kiwei kiwei ki scheme kam pynroi jong ka Sorkar, ka tnad Meghalaya State Planning Board, ha ka jingiakren ‘open session’ kaba la pynlong ha ka 8th January 2014, da ka the Meghalaya State Planning Board, Working Group-III, bad ki nongkitkam Shnong ki Nongkitkam VEC kum ki Chairman, Secretary, bad ki Women’s representatives jong 320 Village Employment Councils (VEC) kiba don hapoh u pud u sam jong ka Mawshynrut C&RD Block, West Khasi Hills District, ha Riangdo ban sngap ia ki jingai jingmut ki jingsngew jong ki halor ka jingtreikam jong ki ‘Progress of Schemes, the implementation and achievements of various developmental schemes khamtam ki jingeh ki jingmyntoi kiba la mih na ka Mahatma Gandhi NREGS /NREGA
Lah ban ong ba ka Mawshynrut C&RD Block ka dei kawei na kiba heh tam bad kaba ar ha ka jing don bun ki VEC haduh 324 tylli ki Village Employment Councils.
Katei ka jingialang ka la long ha Riangdo, Mawshynrut C&RD Block office, 155 kms na Shillong, ha kaba la plie da u Bah. Madondor Tongper, MCS, BDO, Mawshynrut C&RD Block, bad la pyniaid da u Bah. John F Kharshiing, Co-Chairman, MSPB, & Chairman, Grand Council of Chiefs of Meghalaya, ha ka jing donlang i Dr(Mrs) Eureka Lyngdoh Mawlong, Dy Chairman, MSPB, bad ha ka jingdonlang ki Officer Agriculture kynthup ki Gram Sevaks bad kiwei kiwei ki officer jong ka C&RD Block.
Shwa ban sdang ka jingialang u Co-Chairman bad I Deputy Chairperson, ki la ia kynduh bad ia kren bad ki Gram Sevak, ban sngap bad sngewthuh ia ki jingeh kaba ki shem ha ki jingtrei jong ki. Kiba bun ki la pynsngew ia ka jingshitom jong khamtam ha ka leit ka wan namar ka jing duna ka lynti iaid kali, ki la pyntip ba bun ki shnong ym lait ban liet ha ki por slap. Ki la pynpaw ia ki jingeh namar ka jingthut jong ka Mobile network bad ka jing bymdon Internet.
U Bah John F Kharshiing, Co-Chairman, u la ai khublei ia u BDO uba la shim khia ban lum ia ki VEC, bad u la kyntu ia ki Gram Sevaks ban long kiba kloi ban shim khia ban iarap ia kiba sah dien tam, ban ban long ruh ki thied jong ka sorkar ha ka roi ka par.
Ha ka jingiakren ha khmat ki paidbah, ha kaba la khot ia ki nongkitkam jong ki 324 tylli ki VEC kiba don hapoh ka Mawshynrut C&RD Block, West Khasi Hills, la ai lad ia ki ban kren mar 2 miniute ban pynpaw ia ka jingsngew ka jingaijingmut jong ki kumno ban nang pynjanai ia ki scheme bapher bapher jong ka Sorkar khamtam ka scheme MGNREGS.
Ha kaba sdang ki riewkhmat, ki Sordar ki Nongkitkam jong ki VECs na ki kyndong jong ki 324 ki shnong, ki la pynpaw ia ka jingkmen bad la ai khublei ia ka Sorkar India namar kane ka Scheme MGNREGS naduh ba ka la sdang sha kine ki thain 2008 – 2013, ka la sdang pynkylla ia ka dur jong ki shnong ki thaw kiba kim juh lah mutdur ban ioh kum kine ki jait scheme.
Ha kane ka jingiakynduh kaba markhmat, ki jingai jingmut bad ki jingeh kiba mih ki long ba ka Mawshynrut C&RD Block, West Khasi Hills, ka long lehse ka Block kaba heh tam ha ka jingjngai ki shnong (ki don ki Shnong kiba jngai 130 km na Riangdo, ka office C&RD Block bad ka jingheh u pud u sam (geographical area) bad lah ban ong ba kadei kawei na kiba sah dien tam hapdeng ki 39 tylli ki C&RD Block. La ioh lum ba antad kumba palat 150 tylli na ki 324 tylli ki VECs kim pat poi lane ioh surok rong, palat 100 tylli ki 100 VECs kim don umbam umdih (potable drinking water), bad dang don antad kumba 20 tylli ki Shnong ki VECs kim don kano kano ka bording.
Katto katne ki jingeh haba pyntreikam ia kane ka MGNREGS ka long ba ki kyrpad ba ka Sorkar India kan pynbun ki kam kiba lah ban pyntreikam lyngba ka Mahatma Gandhi NREGA. Ka jing bym don ki bank ha kiba bun ki Shnong, ki hap iaid lynti 130 km ban poi sha ka bank ha Riangdo bad la dawa ba kan don ka jingplie lynti ban ailad ia kumkita ki Shnong ban sei pisa da ki VEC. Baroh ki VEC ki long shisur ba donkam ban pynkiew ia ka bai bylla kaba tyngka (Rs) 145 ba kan ia hap dor bad ka bai bylla jong ka jaka.
Ki VEC ki la kyrpad ia ka State Planning Board ban kyntu tyrwa sha ka Sorkar ba kan shah ia ki VEC ban shna ki surok rong, bad ban lah ban shna pynbha ia kiba la duh (repair – maintenance).
U Bah John F Kharshiing, Co-Chairman, u la kyntu ia ki Shnong ban pynkhreh ia ka ‘Map’ jong ka Shnong, ka khana samari jong kawei pa kawei ka Shnong, u la kyrpad ia ki Dorbar Shnong kiba don ki Law Shnong ban phah jingtip sha u BDO bad sha ka office jong u khnang ban ioh ban ia kynduh kyrpang ia kitei ki Shnong kiba don ki khlaw Shnong.
Kiba bun ki la pynpaw ia Ka jingdonkam ban pynjynsur ia ka MGNREGA ha ki jaka riewlum bad kiba bun ki Chairman kiba long ruh ki Sordar ki la pynpaw ia ka jingdonkam ba ka Sorkar India ka dei ban thaw lad ban siew ia ka bai lut sngi bad kabai leit bai wan kumba ioh ki Nongsynshar Shnong ki (Panchayat) sha Ri thor, namar kumba long mynta ki nongkitkam Shnong ki la shuh trei mon sngewbha (voluntarily).
Ki nongiashim bynta ki la kyrpad ia ki heh jong ka State Planning Board ba kin pynsngew sha ka Sorkar ba ka long ka donkam kyrkieh ban pynlong ka delimitation ha ki jingheh jong ki C&RD Block kynthup ka Mawshynrut C&RD Block, ba la dei ban pynjanai ia ka rukom pyllait pisa khlem da pynslem da ki bnai, ban pynbha ia ka Internet namar ka jingdawa jong ka MGNREGA ban hap phah ia baroh ki musteroll, ki estimate bad kiwei kiwei tang lyngba ka Internet, ban shah ia ki VEC ban shna jingkieng iaid kjat ban kam ia ki um ki wah kiba heh, ban ioh ban shna ia ki surok rong bad ban ai ka bai lut sngi (Honorarium – TA & DA) sha ki nongkitkam Shnong bad ki VEC.
Na ka liang u Bah John F Kharshiing, Co-Chairman, Meghalaya State Planning Board, Working Group -3, bad Chairman, Ka Dorbar Ki Khlieh Nongsynshar, u la ong ba kin sa rah ia kine ki jingai jingmut jong baroh ki Chairman, Secretary, Treasurer, Village Employment Council (VEC) bad Area Employment Council(AEC) ban u la kyrpad ia ki ban phah lada don kino kino ia ki jingai jingmut kumno ban pynjanai bad nang kyntiew ia ki rukom treikam jong ki scheme C&RD, da ka jingthoh lyngba ki BDO jong ki lane ban phah beit sha u Bah John F Kharshiing, Co-Chairman, (mobile 9436102663 – office-9856022735), ha ne shwa ban kut u bnai February 2014, kum shibynta ban iarap ia ka State Planning Board ban ioh ai ban pynkhreh ia ka report kaba biang sha ka Sorkar Jylla Meghalaya, la rai ruh ban lum ia ka jingialang jong ki Chairman, ki Secretary, ki Treasurer, VEC bad AEC ha ki katto katne tylli ki Block bad ki District jong ka jylla Meghalaya kum shibynta ban ia kynduh bad sngap markhmat na ki ia ki jingai jingmut bad ki jingeh kiba ki shem ha kaba iadei bad ki scheme Sorkar Jylla bad Sorkar India.
Kiwei kiba la ia kren ha katei ka jingialang ki long i Dr(Mrs) Eureka Lyngdoh Mawlong, Dy Chairman, MSPB bad i Bah M Tongper, MCS, BDO, Mawshynrut C&RD Block.(SP News)
