Shillong, Naitung 14: Ka seng HMYWO ka pynpaw ia ka jing sngewnguh kaba khraw ia ka State Selection Committee khamtam eh ia ka office jong ka NYKS, Meghalaya Zone kaba ibit ban jied ia ka seng ban ioh ia ka Best State Youth Club Award 2012-13 ka ban long ruh kum shibynta ban ai mynsiem shuh shuh ia ka seng ban nang lah ban treikam khambha nangne shakhmat bad ban pynjanai ha ka kam shakri paidbah.
Ka HMYWO ka sngew ba kane ka dei ka burom kaba khraw ym tang ia ka seng hynrei ia ka Thain bad ia ka Hima Mylliem hi baroh kawei bad ha kajuh ka por na ka liang jong ka Seng ka ai Khublei kyrpang ruh ia u Paiem Latho Manik Syiem, Syiem ka Hima Mylliem bad ka Dorbar hi baroh kawei kiba long ki nong ai buit ai bor ia ka Seng bad kiba ju kyrshan borbah ia ka seng ha ki por baroh.
Kum ban shu pynkynmaw hangne ba ka HMYWO ka la ioh pdiang ruh ia ka Khusnam Best District Youth Club Award ha u snem uba la dep i.e.2012 bad ha kane ka kynti kaba mynta pat ka Seng kala lah syndon ban pynjoh sha ka kyrdan kaba kham shajrong ban ioh pdiang syndon ia ka Best State Youth Club Award 2012-13 ha ka 10th July 2013 ha ka jingialang kaba la pynlong kyrpang dang shen ha Donbosco Tech. School, Laitumkhrah da ka NYKS, Meghalaya Zone ha kaba la sam ia katei ka khusnam da u Zenith.M.Sangma Myntri jong ka Sports & Youth Affairs, Govt. of Meghalaya ha kaba la iadon lang ruh bad kiwei kiwei de ki heh sorkar kiba la wan ban sakhi lang ha katei ka sngi.(SP News)
