Shillong, Nailar 27: Mynta ka sngi ka la don ka jingiaisat mar kylliang hapdeng ki pulit bad ki lehnoh GNLA ha ka jaka kaba la tip kum ka Philliport kaba hap hapoh jong ka North garo Hills kaba don ha jan Mendipathar.
Na ka liang ki pulit ki la ioh ia ka jingtip ba ha katei ka jaka ki don ki lehnoh GNLA kiba la pynlong kum ka jaka sah ba shipor ka jong ki bad kipulit ki la leit bad ha ka por ba ki la sdang bankiew ia u lum ki lehnoh kiba don ha jronglum ki la sait pathar ia ki pulit ban ioh lait phet.
Ha kane ka jingther kuli ki lehnoh ki la phet sha khlaw ha kaba ym shym don mano mano ba mynsaw. Na kane ka jaka ki pulit kila ioh shibun ki sop kuli jong ka suloi AK-47 bad na kane ka jaka la ioh ia ka pistol 7.65 la ong ka khubor pulit.(SP News)
