Shillong Naiwieng 02: Da ka jingthmu ban ai jingshakri ia u paidbah bad kumjuh ban plie lad ia ki samla ka jylla ban pule ha ka lain doctor, ka sorkar jylla hynne ka sngi thohdieng kala iasoi ia ka Memorandum of Agreement(MOA) bad ka KPC Group kaba na Kolkatta ban seng ia ka Medical College ha nongbah Shillong.
Ia kane ka soskular na ka liang ka sorkar jylla la soi da u Commissioner and Secretary ka tnad ka koit ka khiah u bah DP Wahlang katba na ka liang ka KPC group la soi da u Dr KP Chaudhuri ryngkat ka jingia donlang u Myntri Rangbah ka jylla u Dr Mukul Sangma, u Chief Secretary ka jylla u bah WMS Pariat bad kiwei kiwei.
U Dr Mukul Sangma ula ong ba ka jingshna ia ka medical college kan ym long tang ban pynmih ia ki doctor hynrei kan long ruh ka jingplie lad ia ki paidbah ka thain shatei lam mihngi ban ioh ia ka jingsumar kaba paka kaba la tip kum ka “super specialty treatment” ia kaba kane ka thain ka dang sahdien.
Nalor kane ula ong ruh ka jinglah ban ai ia ka jingsumar kaba paka kan iarap shibun ia ki paidbah ban lait ka leit phah sumar sha ki hospital kiba don ha kiwei pat ki jylla.
“Ka jingai jingsumar kaba paka kaban don ha ka medical college kan iarap ha kaban rat dyngkhong ia ka jingshem jynjar ki paidbah ban leit sha ki hospital kiba heh kiba don shabar kane ka thain” bad ula ong ruh “Ba don ki khep ba ki paidbah kiba wan na ki longiing ba duna ka ioh ka kot namar ka jingban ka jingduk ki hap ban pyndem noh ha ka jingpang kaba ki don bad bun ki jingim briew la shuh duh ei namar ba kam don ka lad kaba biang ban ai jingiarap ia ki” la ong u Myntri Rangbah ka jylla.
U Dr Mukul ula iathuh ruh ba ka sorkar jylla kan seng sa ia kawei ka medical college ha Tura, kaba hap hapoh West Garo hills district, bad ki jingpynkhreh ha kaba iadei bad kane ka kam ki dang iaid shaid shaid.
Ia kane medical college kaban ai jinghikai ia 100 ngut ki samla pule ha kaba 40 tylli ki seat la bhah kyrpang ia ki samla ka jylla bad kan don ia ka hospital kaba 500 jingthiah ha kaba yn seng ha RP Chest TB Hospital bad la buh ia ka thong ban sdang ia ka jingpule bad ban sdang ia ka hospital kaba 250 jingthiah ha u snem 2016 bad ha u snem 2020 la khmih lynti ba yn ioh ia ka Medical College kaba pura bad ia ka hospital kaba 500 jingthiah.
U khliehduh ka KPC Group u Dr KP Choudhury, ula ong ba u dap da ka jingkmen ban shimti ia kane ka project khamtam haba la kha ia u ha kane ka nongbah bad ula ong ruh ba kane ka sienjam kaba u shim kam long kaba suk bad u donkam ia ka jingiarap na ka liang ka sorkar bad na ki paidbah ka jylla.
Na ki 5 tylli ki kynhun kiba la thep ne tyrwa ban pyntreikam ia kane ka project, ka KPC Group kala shah jied bad ka sorkar jylla kala shim ruh iaka jingiarap na ka International Finance Corporation (IFC) kum ka Project Management Consultant na ka bynta kane ka project.
