Jowai, Nohprah 11: Ha ka jingiadei bad ka jingpynkhreh ia ka jingiaseng Synod jong ka KJP Synod Mihngi ka ban long ha ka Balang Presbyterian Mynso ha ki tarik 13th -16th Lber 2014 ka balang Presbyterian Mynsoo West Jaintia Hills District ryngkat bad ka KJP Synod Mihngi kila pynkhreh shait shait ban pdiang ia ka jingwan jong kane ka jingiaseng Synod ha kane ka shnong.
Na ka liang jong ki bor sorkar la phah ia U Deputy Commissioner jong ka West Jaintia Hills u ma P.S Dkhar lem bad U Superintendent of Police u bah H.G.Lngdoh ryngkat kiwei pat ki heh Sorkar jong kiwei pat ki Department ba kin ia kynduh bad ki nongialam jong ka Balang ban iakren bad ia phylliew jingmut halor ki jingpynbit pynbiang ia katei ka jingiaseng.
Nalor ki jingpynkhreh ia kiba ka Balang ka la pynkhreh, u D.C lem bad kitei ki Officer sorkar ki la kular ruh ban nang pynbit pynbiang bad pynbha shuh shuh kum ka surok, ka umbam umdih, ka light bad ki jaka pynieng kali . Ha ka jingiadei bad ka surok, kum ka Balang ka pynpaw ia ka jingsngewdiaw namar ba haduh mynta um pat biang bha, kumta da ka jingwan kine ki heh sorkar ka Balang ka don ka jingkyrmen ba ki jingtrei ban pynbha ia u surok kin iaid shakhmat.
Ha kane ka jingialang u Rev. G.S Lytan kum u Pastor ba dei peit u la pdiang sngewbha ia kine ki rangbah bad u pynpaw ruh ia ka jingsngewnguh khamtam ia u D.C uba la shim khia ia kane ka kam. Hadien ka jingialang la ioh ruh ban leit jurip ia ka jaka pynieng kali bad jaka long jingiaseng.(SP News)
