Nongpoh, Jymmang 27: Hadien ba ka Khasi Student Union (KSU) North Khasi Hills ka la byrthen tyngeh ban pynhiar kput kylla ia ki jaidbynriew Karbi kiba shong basah ha ka jylla bad ha Ri Bhoi District, namar ka jingsngewkhia halor ka jingshah thombor ki paradoh parasnam kiba shong basah ha Block II ha ki kynhun lehnoh jong ka Karbi People Liberation Tigers (KPLT). Ki nongialam jong ka All Meghalaya Karbi Association (AMKA) ki la shimkhia ban leit ia kynduh ia ki nongialam jong ka KSU ha Nongpoh ban iakren sngewthuh jingmut.
Ia kane ka jingiakynduh hapdeng kine ki arliang mamla la pynlong ha ka ophis treikam jong ka KSU ha Nongpoh, ha ka jingiadonlang u President ka KSU, North Khasi Hills District Samla Ferdynald K Kharkamni, samla Vincent Makri, Secretary lem bad kiwei ki dhot bad ka liang ka AMKA hapoh ka jingialam jong u president Bah B.S Teron, Bah Moris Ingti, secretary bad u Adviser Bah O.L Teron bad kiwei ki nongialam ban iakren halor ka jingshah thombor ki Khasi ha Block-II.
Haba kren bad ki Nongthoh Khubor hadien ba la wai ka jingialang, u Bah Teron u la iathuh, ba na ka liang ka seng kaba peit ba khmieh ia ki jingeh jong ki jaidbynriew Karbi ha kane ka Jylla bad ruh ha Karbi Anglong ka dap da ka jingsngewkhia kaba jur halor kitei ki kam thombor jong ki lehnoh Karbi pyrshah ia ki Khasi Khara kiba shong basah ha Block II. “Ka AMKA ka ieng shkem ba kam kwah ban wanrah ia ka jingsngewpher jaidbynriew hapdeng ki Khasi bad ki Karbi bad ka pynrem jur ia kum kane ka jingpynibor bad ka jingthombor jong ka lehnoh KPLT pyrshah ia ki Khasi ha Block II,”
Ka AMKA kan nym ai lad ia kum kine ki jingjia ba kum kitei ki kynhun lehnoh kaikhlaw na Karbi Anglong (Assam) kin nang pynjur ha kane ka jylla bad khamtam ban pynlong langknia ia ki jaidbynriew Khasi kiba shong basah ha ki khappud jong ka Meghalaya bad ka Assam la ong u bah Teron.
U la ong ruh, “ka seng ka thrang ban wanrah ia ka jingshongsuk shong shngain hapdeng kine ki ar jaidbynriew bad shen kan sa lum ia kiwei kiwei ki sengbhalang na Karbi Anglong, khnang ba kin lah ban shim pat ia kiwei kiwei ki rai kiba donkam na ka bynta ban pynneh ia ka shongsuk shongshngain bad khamtam ban iada ia kum kine ki jingsngewpher jaidbynriew hapdeng ki Khasi bad ki Karbi”.
Kumjuh ruh u president ka KSU, NKHD u samla Kharkamni, u la pynpaw ia ka jingsngewkmen kaba khraw bad ruh ban ai khublei ia ki nongialam jong ka AMKA halor ka jingshimkhia jong ki ban wan mih sha ka miej jingiakren na ka bynta ban pynbeit bad ia mir jingmut halor kitei ki kam thombor jong ka kynhun lehnoh na Karbi pyrshah ia ki Khasi Khara kiba shong basah ha Block II.
U ong ruh katkum ka jingpynbeit ha kane ka jingialang bad ki nongialam jong ka AMKA ki la shim ruh ia ka rai ban pynbeit ruh ia ka jingiakynduh lang ka ban sa long shen bad kiwei kiwei ki sengbhalang na Karbi Anglong na ka bynta ban iakren sngewthuh bad ruh ban wad ia ki lad ki lynti kumno ban wanrah ia ka jingsngewthuh jingmut lang hapdeng ki jaidbynriew Karbi bad ki Khasi bad khamtam eh ban pynbor ia ki kynhun kaikhlaw na Karbi Anglong ba kin sangeh noh mardor ia ki kam thombor bad dawa pisa na ki paradoh parasnam kiba shong basah ha ki khappud.(SP News)
