Jowai, Risaw 27: Ka jingaijinghikai ba ar sngi ia ki khynnah bad samla
pule haka shnong Jowai ha kaba ia dei bad ka jingringdur bad jingsuitrongdur (Art Workshop) bad ka jingpyn-inam iaki dur bala ringdur bad suit-rong daki nongringdur bad nongai-rongdur ba pawnam kala poi sha kaba kut haka 26 tarik u Risaw. Iakane ka prokram la pynlong daka Meghalaya Awareness Society of Communication (MASCOM) ha ryngkat ka jingiatreilang ka Ophis jong u Deputy Commissioner West Jaintia Hills District, Jowai bad ka Riti Academy of Fine Arts Shillong.
Iane jinghikai bad ka jingpyn-inam kaba la sdang naduh ka 25 tarik ha ka Thomas Jones Synod College la plie pyndon burom da u Moonight Pariat MDC haka jingiadon ryngkat u PS Dkhar DC ka West Jaintia Hills, u KK Kharkongor Principal ka Thomas Jones Synod College bad kiwei pat ki riewpawhmat.
Palat 40 ngut ki khynnah bad samla naki skul bad kiskulbah bapher bapher jong ka nongbah Jowai kila wan ban iashim bynta ha kane ka jingaijinghikai kumno ban ring bad ai-rong dur. Ki nonghikai kiba la iarap ban hikai ia ki khynnah shaphang ki jingtip bakongsan kumno ban ringdur bad ai-rong dur haka rukom kaba dei kila iaroh shikatdei eh iaki kynnah bala wan ban iashim bynta. U Raphael Warjri u Chairperson jong ka Riti Arts Academy u ong ba u phylla ban iohi ba ki don shibun ki khynnah kiba don ka sap kaba kyrpang ban ringdur bad ai-rong dur. Kaba itynnad ka long ba ki khynnah ki dang long lui lui bad kane ka jinglong lui lui jong ki ka paw haki dur kiba ki ring bad ai-rong.
U Manoj Das uba long u ophisar badei peit iaka Assam Art gallery hs Guwahati ula ong bad ki don bun ki khynnah kiba don ka sap ha kaba ringdur bad kine ki lah ban shim ia kiba bun ki lad pule ban pyntbit khnang ba kin iohkam iohjam. Ula ong ba u iohi ba ki don ki khynnah kiba lah ban pule iaka tnat pule fashion designing, ki lah ban pyntbit haka lad pule Animation, Industrial arts, architecture bad kiwei kiwei.
Naka liang jong ki khynnah ruh u samla Plielad Pohtmi ula ong ba kane ka dei ka sien kaba nyngkong ba un iohlad ban iashim bynta ha kum kine ki jingai jinghikai. Haka jingim jong u, um pat ju iohi ruh iaki jingpyninam ia ki dur kumba long mynta. Naka liang u R. Lyngdoh ula ong ba kane ka jingaijinghikai kala iarap ia u shikatdei ba un nangpyntbit ialade haka sap kaba uladon lypa.
Ka jingpyninam iaki dur kala khring ruh ia shibun ki nongwapeitkai iaki dur kiba la wah ha ki kynroh jong ka Thomas Jones Synod College. Ki briew kiba la wan ban peitkain iaki dur kila iaroh ruh iaki dur kiba la wan pyninam.
Nalor ka Workshop bad ka Exhibition ha kine ki ar sngi kala don tuh ka jingringdur bad airing haka jain ramhah (giant canvass) bad ki nongringdur bad ka nongairong dur (Painters) bapawnam jong ka shnong Jowai kum u Dr C.H. Pakyntein, u C.H. Passah bad u samla Maradona Myrboh kila iashimbynta ryngkat bad kito kiba wan na Guwahati bad Shillong ha kaban pynwan dur iakata ka jaindur ramhah.
Ka kong Martina Lytan kaba long ka EAC ka ophis u Deputy Commissioner West Jaintia Hills Districk kala sam iaki jingaikhusnam sha kito kiba lehbha haka jingaijinghikai. Haka jingialang pynkut la ioh ruh iaka jingkren na u D R M Buam uba long u Secretary ka MASCOM bad iaka jingialang la pyniaid da u HH Mohrmen. (SP News)
