Shillong, Jylliew 24: U Chief Secretary jong ka jylla Meghalaya u Bah WMS Pariat u la ong ba ka sorkar ka sngewkhia bha ia ka jinglong jingman ha kaba ia dei bad ka shong suk shongsain ha Garo hills. Na ka liang jong ka sorkar ka la shim ia ki lad ki lynti baroh kumno ban tem ia kane ka jingjia ha Garo Hills.
Na ka liang jong u Chief Secretary u la ong nynnien mynmiet ki briew ki bym lah ban tip ki la leit sha ki jaka tih dewiong ha nangalbira ha kaba ki la pynkulmar bad ha kane ka jingjia phra ngut ki nongbylla ki la iap bad saw ngut kiwei pat ki la mynsaw.
Na ka liang jong ka sorkar ka la shim ia ki lad ki lynti baroh kumno ban wanrah biang ia ka shong suk shong sain ha katei ka bynta jong ka jylla. Ban ia rap ia ki pulit kiba la don lypa ha katei ka thain ka sorkar ka la phah shuh sa lait company ka kynhun pulit nalor kata la phah shuh shuh ruh ia ki pulit jong ka jylla.
Na ka liang jong ka sorkar jylla ka la pan pulit pahara shuh na ka sorkar pdeng sa kumba lai ne saw kynhun company bad ka shong ha ka sorkar pdeng ba kan phah lada ka don.Haba ia dei bad katei ka jingjia na ka liang jong ka sorkar ka dang ap ia ka kaiphot ba kan poi sha ka sorkar.
Katkum ki jingltip kiba la lum da ki bor sorkar ia kine ki phra ngut kiba la duh ei ia la ka jong ka jingim ha ka jingshah thohbor ha ki riew sniew ki long u Babul Ali, Jiarul Islam, Ajot Ali, Azur Ali, Modon Ali, Moral Hauz, Ismail Ali , Shahjahan Ali. Hynrei haduh mynta ym pat lah ban tip ia ka kyrteng ka shnong jong ki.(SP News)
