Shillong, Nohprah 21: Ha ka sien kaba nyngkong ha jylla Meghalaya, ka State Plan
ning Board, jong ka Sorkar, ki la pynlong ia ka jingiasyllok (open interaction) ha ka 20 tarik December 2013, ha Nongstoin, bad ki 263 tylli ki Village Employment Councils,(MGNREGS) kiba hap hapoh ka Nongstoin C&RD Block, West Khasi Hills District, ban sngap bad iohsngew markhmat ia ki jingaijingmut jong ki halor ki kam pynroi na ka tnad C&RD khamtam ha kaba iadei bad ka scheme MGNREGS.
Ha katei ka jingialang la don lang ki nongkitkam kum ki Chairman, Secretary, bad ki Longkmie, kiba la wan mih khmat na kumba 260 tylli ki Shnong na kylleng ka thain Nongstoin.
Ia ka jingiasyllok la plie da u Bah V. Swer, MCS, BDO, Nongstoin C&RD, bad la aiti ban pyniaid da u Bah John F Kharshiing, Co-Chairman, Meghalaya State Planning Board, & Chairman, Grand Council of Chiefs of Meghalaya, ha ka jingiadon lang ki khadsan ngut ki Gram Sevaks bad ki officer Sorkar na ka tnad State Rural Employment Society(SRES).
Ha shwa ban sdang ka meeting u Co-Chairman, u la pynlong ka jingiasyllok kaba lyngkot bad u BDO, bad ki khadsan ngut ki Gram Sevak ban iohsngew ia ki jingeh kiba ki shem ha ka jingtreikam ka jong ki. Ha katei ka jingiakren u Bah John F Kharshiing, Co-Chairman, MSPB, u la ai bun ki jingaijingmut ia ki khnang ba kin lah ban long ki nongiarap ia ki paidbah bad ia ka Sorkar ban lum thup ia ki jingtip kiba kongsan (kum ka khana samari) na ka bynta ka Sorkar.
Hadien kane la plie ia ka jingiasyllok paidbah ha kaba la ai lad ia baroh ban kren ia kaba ki kwah ban pynpaw bad la ai por ia baroh ban kren hapoh 2 minute.
Ki nongmihkhmat VEC kiba wan na ki 260 tylli ki Shnong kiba na jan bad kiba na jngai, ki la pynpaw ia ka jing sngewhun bad ka jingsngewnguh ia ka Sorkar India halor kane ka scheme MGNRES bad baroh ki la pynpaw ba kane ka dei kawei na ki scheme Sorkar kmie kaba la wanrah ia ka jingkylla ha ki Shnong ki thaw sha kyndong.
Ha ka juh ka por, hadien ka jingia syllok na kiba bun ki VEC kynthup na ki longkmie ki la pynpaw ba kane ka jingiasyllok ka long kaba dei ban pynlong man ka por khnang ba ki bor Sorkar kin ioh ban ia phylliew jingmut ha kiba bun ki liang ha kaba iadei bad ka roi ka par.
Ka jingialang ka la rai da shi sur ban kyntu ia ka State Planning Board, ban iakren bad kibor jong ka tnad C&RD, ban shim khia halor ka jingduna palat ki nongtrei hapoh ka Nongstoin C&RD Block, ban pynkiew ia ka bai bylla sngi katkum ka jinglong jong ka por, ban thaw lad ban siew biang por ia ki nongbylla, ban buh pynbiang bad pynjanai ia ki jingdonkam jong ka ‘Internet kaba kham sted’ ban ioh ban pyndep ia ki kam kiba ka dawa ka scheme ban phah (online) lyngba ka internet ia ki estimate, ki proposal, bad ki muster rolls, ha ka por kaba biang, ban pynkiew ia ka dor dewbilat bad u rod bad kiwei kiwei kat kum ka por bad ka dor hapoh iew, ban shah ban thaw ia ki jingkien iaid kjat (footbridge) kum kawei na ki kam ban ioh ban pyniasnoh ia ki jaka rep bad ka shnong, khamtam ki Shnong kiba dang sah dien ha surok synkien, bad kaba khatduh ba ki bor Sorkar ki dei ban siew ia ka bai lut sngi ia ki nongkitkam VEC, namar ka long kaba khia ka kam kumba ka long mynta, bad khamtam ki la trei mon sngewbha naduh u snem 2006-2007, ia kane ka kam NREGS khlem kano kano ka jingsiew.
Na ka liang u Bah John F Kharshiing, Co-Chairman, Meghalaya State Planning Board, Working Group -3, u la pyntip ba ka State Planning Board kan sa leit sha ki katto kattne tylli ki C&RD Block ban ioh sngap markhmat ia ki jingaijingmut na ki Chairman, Secretary, Treasurer, Village Employment Council (VEC) bad Area Employment Council(AEC) bad u la kyntu ia ki ban phah lada don kino kino ia ki jingai jingmut kumno ban pynjanai bad nang kyntiew ia ki rukom treikam jong ki scheme C&RD, da ka jingthoh lyngba ki BDO jong ki lane ban phah beit sha u Bah John F Kharshiing, Co-Chairman, (mobile 9436102663 – office-9856022735), ha ne shwa ban kut u bnai February 2014, kum shibynta ban iarap ia ka State Planning Board ban ioh ai ban pynkhreh ia ka report kaba biang sha ka Sorkar Jylla Meghalaya. La pynwai ia ka jingiasyllok da u BDO Nongstoin, C&RD uba la ai khublei ia baroh kiba la shim khia ban poi shitom na jan bad kiba la wan iaid kjat ban poi sha kane ka jingiasyllok kaba donkam bha. U la ong ba mynta ki block kim long shuh kumba long mynshwa ha kaba la rai ki scheme ha block, u la ong mynta baroh ki kam la shim rai da ki paidbah ha ki Shnong bad ki sa phah pat sha ki Block bad ka kam jong ka Block ka long tang ban buddien ia ki jingai jingmut na ka liang ki VEC bad ki Shnong.(SP News)
