Shillong, Nailur 08: U myntri rangbah ka jylla u Dr Mukul Sangma mynta ka sngi 
u la kren shai ha ka jingialang jong ki seng sain pyrthei ba ka sorkar kan nym pyntrei kam ia ka ILP ha kane ka jylla Meghalaya.
Ha kane ka jingialang na ka liang jong u myntri rangbah u la kdew ba ka jingai jingmud jong ka High Level Committee ka don bun kijingdkhoh ha kaba ka sorkar ka iohi ba lada shim ia ka kan long tang ka jingpynslem kai ia ka por.
Na ka liang jong ki seng sain pyrthei kiba la ia ia poi ha kane ka jingialang ki long ka KHNAM, MDP, NCP, NPP, UDP, Congress, HSPDP bad ka GNC. Ha ka jingkren ka jong ki baroh ki la pynpaw ki kwah ban tip aiu la jia ia ka HLC, ha kaba u myntri rangbah u la ong ba kane ka HLC kam biang namar ki don bun ki jingduna.
U Working President jong ka KHNAM bad u Vice president jong ka HSPDP ki la kren shai kdar ha kane ka jingialang ba kine ki party ki kwah ban pyntreikam ia ka ILP ha kane ka jylla bad ka dei tang ka ILP kaba lah ban khang ia ka jingwan tuid ki bar jylla.
U president jong ka GNC U Clifford Marak u la ong ba u la dep iohi lypa ba ka sorkar kan nym pdiang ban pyntrei kam ia ka ILP ha kane ka jylla kam don jingmud bad shong kumta u la mihjyndat na ka jingialang.
Kiwei ki seng kum ka NPP, ka UDP ki kwah ba ia ka ILP dei ban pyntrei kam katba ka NCP bad ka MDP ki kwah ban dang peit bniah shuh shuh ia kane ka bynta namar kumno kan ktah ia ka jylla ha ki ba bun ki liang.
Ha dien ba la ioh sngew ia ki jingkren na baroh ki seng sain pyrthei kiba la ia poi sha kane ka jingialang u myntri rangbah u la ong ba wat ka Ri America bad ka Ri Bilat mynta ki kwah ban wanrah ia ka Ain Aiwai kaba khlain ban ia da na ka jingtuid jong ki briew sha kitei ki ri.
U myntri rangbah u la kular ia baroh ki seng sain pyrthei ba ia ka Tenancy Act kaba ka sorkar ka la pynkhreh yn pyndep mynta u bnai bad ha u Risaw yn sa lah ban ia kren paidbah ban ia mir jingmud ha kaba ki paidbah ki lah ban ai jingmud kumnob an pynbha ia ka ban teh la kam ia ka jingwan jong ki mynder sha kane ka jylla. (SP News)
