Shillong, Nailur 18: U Myntri rangbah ka jylla u Dr Mukul Sangma ha dien ka jingialang jong ka MUA-II u la ong ba ka ILP kam dei tang ma ka kaban iada ia kajingwan tuid jong ki bar jylla, hynrei ki don da kiwei ki lynti ruh ban iada na ka jingwan jong ki bar jylla.
U myntri rangbah ka jylla u Dr Mukul Sangma u la ong ba ka sorkar ka la dep ban pynkhlian ia ki ain kiba la don kum ka directorate of infiltration bad task force ban tehlakam ia ka jingwan rung ki mynder bad ka sorkar kan iaid shakhmat ruh ban pyntreikam ia ka Tenamcy Act ha ka jylla.
Na ka liang jong u myntri rangbah u la ong ba “Katba ki sengbhalang kim pat pynsangeh ia ki jingiakhih ka sorkar kan nym khot iakren ia ki” la ong u Dr Mukul bad ka kren shai ba ka sorkar kan nym pyntreikam ia ka ILP ha ka jylla.
U Dr Mukul ula ong ruh ba ka jingiakhih ym lah ban pynshong nongrim da kaba pynjulor ia ki jingdon jingem jong ka sorkar bad ki riewpaidbah bad ula kren ruh halor ki ain ki kanun kiba khang pyrshah ban pynlong ia ka pakhang shnong bad kiwei kiwei ki jingiakhih.
“Ka rukom pynlong ia ka jingiakhih ka long kaba mih bun ki jingkylli bad ka mat dawa ILP kala mih pyrthei hadien ia kaei kaba la jia hapoh jylla Assam bad ngim kwah ban pynlut kai ia ka por ban pyntreikam ia ka kaiphod jong ka High Level Committee on Influx ha kaba kala ai jingmut ia kaei kaei kaba ym lah satia ban pyntreikam namar ba donkam ban ioh ia ka jingmynjur na ka sorkar kmie” la ong u Dr Mukul.
Ha kaba iadei pat bad ka jingdawa ka Liang pyrshah ka MPF ba u Myntri Rangbah u dei ban hiar shuki noh, u Dr Mukul ula ong “Hato ka MPF ka don bun ki nongmihkhmat ban thaw ia ka sorkar bad ula kynthoh ruh ia ka UDP ba kadei ka seng kaba ka rukom trei kam kam long kaba shai namar ba kane ka seng kam shym la kynthup eiei ia ka jingthmu ban pyntreikam ia ka ILP hapoh ka manifesto jong ka seng hynrei ka mih shakhmat mynta ban dawa ba dei ban pyntreikam ia ka ILP la ong u Dr Mukul.(SP News)
