Shillong, Nailar 04: Ha kine ki sngi, la sakhi ia ka jingsdang khluit kata ka jingialap pyrshah bar jylla bad mynder ri kaba ki seng bhalang ka jylla ruh, ki dang leit iawer na kawei ka district sha kawei pat, ban pan
jingkyrshan na ki paidbah ban pynbor ia ka sorkar ban pyntrei kam noh
da ka ain kaba pyrkhing ban khang lad ia ka jingwan rung kyrthep ki
bar jylla bad ki mynder sha kane ka jylla.
Katba kane ka jingiawer paidbah ka dang thnam bha haduh mynta mynne,
hynrei dang hynne ka step sngi U Blei kumba haka por 4 baje, katba ki
nongshong shnong ka nongbah kiba don naki kiba dang iohthiah lyngngai,
katba don pat pat kiba la khie bad sdang ban pynkhreh ia ka sha step,
kyndit kynsan haka shnong Mawlai Nongpdeng, la wan poi wir shi kali ki
bar jylla kiba ym lah satia ban pynshisha la ki dei ki tang ki bar
jylla kiba la wan kiew sha kane ka jylla khlem ki kot ki sla kiba
biang ne ki dei ki mynder kiba wan kiew na Ri Bangladesh.
Mar synlap ia kine ki briew kiba la sdang ban pynkhreh ia ka bam step
da kaba sei ia ki khiew bad ki stove ban shet ata harud surok, ki
nongshong shnong jong ka shnong Nongpdeng ki la iamih paidbah bad bat
ia kine ki briew kiba don 11 ngut baroh ba kynthup ia ki 8 ngut ki
shynrang, kawei ka kynthei bad 2 ngut ki khun ba dang rit jong ka. Haka
jingtohkit, kine ki bar jylla ki la iathuh ba ki la wan kiew na ka
Nongjri bad thmu ban leit sha Dhubri, Assam ban iashim bynta haka
jinglehniam Id-Ul-Fitter ka ban hap haka 9 tarik mynta u bnai.
Haka jingtalasi ia ki pla jong kine ki briew ki nongshong shnong ki la
lap ruh na ka pla jongki ia ki nar rot kiba la ot lyngkhot lypa bad u
sainar, ia kaba la suba ba kine ki briew ki dei ruh kiba donkti haka
kam tuh. Kine ki briew ki la iathuh ruh ba ki la don haka shnong
Nongjri, la kumba 4 bnai mynta bad ki trei bylla shna iing bad uwei u
Contractor ia uba la ju khot u Mon.
Ia kine ki bar jylla la wan shimti noh da ki pulit hynne hi ka step
bad ki pulit ki dang pynlong ka jingtohkit kaba bniah, ban pynshisha
ba ki dei na kano ka jaid bynriew bad kumno ki poi sha Mawlai, namar
katkum ka jingiathuh jongki, ki la ong ba ki wan na Nongjri bad thmu
ban leit sha Dhubri Assam, kaba ka Mawlai Nongpdeng kam iahap satia
bad ka lynti iaid jongki.(SP News)
