Shillong, Rymphang, 05: Shwa ban wan tied jingkhang ka aiom lyiur, ka kyntoit shnong Wahheh kaba hap ha ka shnong Mawpat ka la ioh ia ka jingkieng dewbilat ka ban pyniasoh ia ka Dong Circle-I bad Circle-III. Ia kane ka jingkieng dewbilat la shna na ka mang tyngka jong ka 13th Finance Commission 2010-2011 ha ka jinglut kaba T. 2.50 lak.
Ia kane ka jingkieng dewbilat la plie paidbah hynne ka sngi da u Bah Embhahlang B. Syiemlieh, MLA/MDC ka Mawlai Constituency ha ryngkat ka jingiasakhi lang u Bah K. Ryntathiang, Rangbah Shnong, Bah R. Kharkongor, Asst. Rangbah Shnong, ki dkhot ka Executive Committee ka Dorbar Shnong Mawpat, Bah L.S Kharbuli, EE ka KHADC, Bah Gervasis Kharmujai bad ki nongshong shnong ka shnong Mawpat.
Shillong,Rymphang,04: U Bah Ryntathiang, uba long u Rangbah Shnong , u la ong ba ka jingpynioh u Bah Embhahlang B. Syiemlieh ia kane ka jingkieng dewbilat na ka skhim MDC ka la long ka jingmyntoi bad ka jingkyrkhu kaba khraw ia ki nongshong shnong khamtam ia ki khynnah skul kiba ju mad ia ka jingsyrtok kaba khraw ha ka por lyiur ban jam sha shiliang namar ka jingheh jong ka um.
Shwa ban pynkut noh ia ka samoi treikam kum u Nongmihkhmat ia ka Mawlai Constituency sha ka Khasi Hills Autonomous District Council (KHADC), u Bah Embhahlang B. Syiemlieh, hynne ka sngi u la aiti ia ka Work Order kaba mar T.50 hajar sha u Bah B.R Kharmujai, Rangbah Shnong ka Mawlai Mawdatbaki ha ryngkat ka jingsakhi lang ki dkhot ka Dorbar Shnong na ka bynta ban theh ia kam pynroi ha ka kyntoit Nongpathaw, Mawapkhaw bad ha Pdengshnong na ka bynta ban tei pyndep ia ka Community Hall.
Ha kajuh ka por u la leit aiti ruh ia ka Work Order sha ki nongialam ka Shnong Mawlai Mawtawar, Riat Tamdong bad ha Laitlum ban tei ia ki Community Hall bad lynti iaid kjat ha kaba ka baroh ka skhim ka la kot sha ka T.7.50 lak. Ha kajuh ka por u la aiti ruh ia ka Work Order sha ki ar tylli ki skul kiba kynthup ia ka Mawtawar Presbyterian L.P School bad Christian School kiba la ioh mar T.50 hajar.(SP News)
