Shillong, Naitung 21: Ka tand pule Allied Health Sciences, Martin Luther Christian University, Shillong da ka jingiatreilang bad ka Medical Mobile Unit (MMU) jong ka sorkar NRHM, Bethany hospital, Bansara Institute of Ophthalmic Sciences, Shillong bad ka Diengiei PHC ki la pynlong ia ka jingai jingsumar ei ia ki briew ha ka shnong Nongpathaw ha kaba baroh kiba la ioh jingmyntoi ki la poi sha ka 372 ngut.
Ia kane ka jingai jingsumar ei la pynlong ha kine ki khyndait sngi ha katei ka shnong, ka jingpynlong ia kane ka jingai jingsumar ei ka long ha kajuh ka por ban hikai ia ki paidbah kumno ban nang ban sumar ia lade ban ioh ia ka met kaba koit kaba khiah bads ban pynsngewthuh ia ka jingdon kam ban leit ia kynduh ia ki doctor haba don kam.
Ha kane ka jingai dawai ei ia ki khynnah la peit da u Doctor Dr M Surong, Bethany Hospital, Dr GT Passah, NRHM bad Dr C Wann, jong ka Diengiei PHC. Katba ia ka jingpeit bniah ia ki khmat pat la leh da ki samla pule j BSc Optometry students.
Na kitei kiba la wan shah sumar ei kiba bun dei ki khynnah skul kiba la poi sha ka 250 ngut bad kiwei pat ki dei ki long kmie. Ha kane ka sngi la ai ruh ka jinghikai ia ki samla ba kumno ki dei ban sumar ia lade khamtam haba kin da la poi ka rta shongkha shong man bad ia ka rukom bam rukom dih.(SP News)
