Shillong, Jymmang 27: Ki paidbah jong ka shnong Nongrim Jirang, Ri Bhoi District ki dap da ka jingkmen kaba khraw ba mynta ki la lah ban ioh ia ka surok rong ka shi kilometer, kiba ym pat ju iaid ia ka surok rong la bun bun snem hynrei mynta u snem da ka jingtreishitom u BDO ka Jirang C&RD Block ki la ioh.
Katei ka surok kaba la pyntrei da ka shkim bylla shispah sngi, la mang T.25 lak na ka shkim BRGF tang ban siang rong na bynta 1 km bad kaba sngew tynnad shuh shuh ka long ba ba u kontraktor u la lah ban pyndep na bynta ban siang rong dangshen.
Hynrei la kynnoh ba ka jingsiang rong ia kane ka surok ka long kaba ithumula ka long ba ka rukom pyntrei ia katei ka surok naduh ka rukom siang maw haduh ban siang rong kam long satia kaba biang kum kiwei kiwei, La kynnoh ia u kontraktor ba u la pyntrei ia katei ka surok ym katkum ka jingkwah jong ki paidbah,
Na ka liang jong ki paidbah katei ka shnong kim hum ia kane ka rukom siang rong bad ki kwah ban tip ha kano ka rukom la siang rong bad la ka don ne em ka jingthew ha ka rukom siang rong.(SP News)
