Shillong, Nailar 02: Kum ka dak jong ka jingburom ia ka long kmie khasi kaba la lah ban kiew nyngkong ia u Lum Mangkashang ka kynhunshipai Indo-Tibetan Border Police Force (ITBPF,) ka la pynlong ka jingpynkup burom ia ka kong Wansuk Myrthong.
Haba kren ha ka jingialang u R K Saini u ba dei peit ia ka ITBPF jong ka dong shatei lam mih ngi jong ka Ri India u la ong ba kane ka kynhun shipai ka dei ka kynhun kaba la shah hikai kyrpang ban kiew lum.
Ha kane ka jingialang u la ai ka jingiaroh ia ka kong Myrthong kaba dei na ka tnad pulit jong ka jylla Meghalaya, na ka liang jong u tei u heh jong ka tnad shipai ITBPF u la ong ba ki long kiba la kloi ban ai ka jinghikai ia kito kiba kwah ban kiewlum.
Kane ka kynhun shipai kaba la mang kyrpang ba kin ai ka jingiada ia ka Ri ha ki jaka lum mynta ki peit ia ki jaka kum ka Karakoram Pass ha Ladakh haduh Jachep La jong ka jylla Arunachal Pradesh kaba long haduh 3488 km ha khappud bad ka Ri China bad kinekilum ki jrong haduh hapdeng 9000’ haduh 18700’ na sla duriaw.
Ka kong Myrthong ha ka jingleit kiew ia u lum Mangkashong ka la ia kynduh shibun ki jingeh hynrei ka jingshlur jong ka ka la pynlong ia ka ban poi sha ka thong. (SP News)
