Shillong, Rymphang 15: Ka jingialap eletion na ka seng Congress na ka bynta ban jied ia u kyrtong Mawkyrwat MDC ka la long mynnin 14 tarik February 2014 ha Iew Mawkyrwat
Katei ka jingialang ialap election ha Mawkyrwat la pyniaid da u Bah Rowell Lyngdoh, MLA, Deputy Chief Minister, uba long ruh u President, Mawkyrwat Block congress Committee (MBCC).
Ha ka katei ka jingialang la ioh jingken na u Kyrtong MDC na ka liang ka seng Congress u Bah Deliverland Lyngdoh, uba la kyrpad ia ki paidbah ban ai lad ia u ban trei na ka bynta ka bha ka miat jong ka thain Mawkyrwat.
Kiwei ki nongialam Congress kiba la poi ban ialap election ki kynthup ia u Bah Banang Tyngsong, Secretary, Meghalaya State Youth Congress, bad u Bah John F Kharshiing, Vice-President, East Khasi Hills District Congress Committee, kynthup ia kiwei kiwei ki nongkitkam jong ka seng Congress jong ka thain Mawkyrwat.
Na ka liang u Bah John F Kharshiing, u la ong ba ki paidbah ki Donbok ba long Election MDC 2014 hadien ba la dep ka MLA Election 2013 namar kum ba ka long ha kine ki snem kiba la dep ym pat juh don Executive Committee ha KHADC lane ha JHADC kiban neh lada ki dei kiba pher na ka rong bad ka lama kaba don ha ka jingsynshar ha Secretariat. Jan baroh ki MDC ki party kumba ka long mynta ki ia thiah syiad bad ka Seng Congress ynda la dep election bad ka dei tang ha ka por election ba ki mih ban kaweh ia ka lama.
Kumba ka long mynta u la ong ba la tikna ba ka Congress kan synshar biang ha KHADC bad ha JHADC namar ki paidbah ki angnud ba ka dei ban don ka juh ka Sorkar ha District Council bad ha Secretariat.
U la pynpaw ba wat haduh kine ki sngi jan baroh ki MDC bad ki Party ki ia trei lang hapoh kawei ka tnum iing jong ka seng Congress. Ha ka jingshisha u la ong ba ka nuksa ka jingiatrei lang bad ka Congress ka long kaba bha ha District Council kaba ngi iohi baroh mynta san snem. Kumta u ong ba kan jin lada bha ia ki paidbah ba kin ai kawei ka Sorkar hapoh District Council khang ba long kaba iaid beit iaid ryntih.
U la ong ba kumba ka long mynta ka paw ba dei ka seng Congress kaba don ka lynti kaban ai ia ka jingsynshar kaba khlain bad kaban neh baroh san snem.
U la ong ba ha kum kane ka por ba ka Sorkar India ka dang khreh ban pynbeit thymmai ia ki kyndon jong ka Sixth Schedule la donkam ban peit ba ka Sorkar Meghalaya bad khamtam ha District Council kin long kawei ka sur ban iada ia ki hok jong ka Ri bad ba ki seng riewlum kim lah namar ki ia pait ia pra.(SP News)
