Shillong, Nailur 19: Ha ka jingialang kaba 24th jong ka dorbar bah ka pyrthei ban peit ia ka hok long briew man briew kaba la long ha Geneva, u nongmih khmat kum u Permanent Representative sha ka UN u ba dei ruh u Cahirman jong ka Meghalaya Peoples Human Rights Council (MPHRC) u Bah Dino DG Dympep, ha ka jingkren ka jong u la ong ba ha ki ri kiba don ha poh ka dewbah Asia kiba bun na ki ri ki don ia ka ain National Security Act ban ia khun pyrshah ia ki lehnoh.
Kine ki ain kiba la ai bor ia ki shipai, ka long ban ia khun pyrshah ia ki lehnoh bad ha ka kyrtreng jong ki lehnoh la lehbein ia ki riewlum kiba dei ki rit paid, kum ia ki nongialam jong ki bad bun sien la pyndon kam bakla ia ka bor wan ban shim ia ka jingim jong ki ha kaba ki rit paid ki ialeh ban iada ka ka khyndew ka shyiap. Ha kane ka jingshah thombor ki lehnoh ki ieng ban ia leh pyrshah ia ka sorkar jong ki.
Bun sien ki rit paid ha ki Ri jong ka Dewbah Asia ki im ha ki jaka ba long kyndong bad bun sien ki shah khniot hapdeng ki shipai bad kilehnoh bad kane bun sien ka wanrah ia ka phet shnong jong ki rit paid bad kane ka jingphet krieh ka pynlong ia ki ba kin sdang ban duh ia la ka jong ka tynrai ka jong ki., la ong u bah Dympep.
Na ka liang jong u Bah Dympep u kyntu ia ka Human Rights Council ba ka dei ban shim ia ka jingwad bnaih ha kaba ia dei bad kane ka bynta ha ka sien ka ban wan ym tang ha ka pyrthei bad khamtam eh ha Asia.(SP News)
