Nongpoh, Rymphang 23: Ka Indian National Congress (INC) ka la khur ia ka jingjop ha 3 tylli ki constituency ha Ri Bhoi District kynthup ia u Dr DD Lapang myntri rangbah barim uba long ruh u President ka MPCC, u Dr Celestine Lyngdoh uba long u MDC na Nongpoh u la jop na Umsning bad u ma Ngaitlang Dhar na Umroi. Katba u Chairman barim ka HNLC u Bah Julius Kibok Dorphang u ba la iakhun kum u kyrtong shimet na Mawhati constituency bad ruh u Bah Lambok Mylliemngap na ka North East Social Democratic Party (NeSDP) ki la khur ia ka jingjop ha kane ka ilekshon sha ka Ing Dorbar Thawain 2013.
U Dr DD Lapang sa shisien pat ula pynibor biang ha kane ka kynti ba u ioh ka jingshaniah bad ka jingieit ki paidbah ka Nongpoh constituency da kaba pynliem ia ka kyrtong ka UDP ka Kong Rona Khymdeit da 3598 vote. Katba u ha Umsning Constituency u Dr Celestine Lyngdoh u la lah ban thaw ia ka history ha kane ka constituency kaba thymmai ha Ri Bhoi kum u nongmihkhmat ba nyngkong da 1942 vote ia u kyrtong shimet uba long u President barim ka KSU Donkupar Sumer bud sa u kyrtong ka UDP u Bah Field Marshall Mawphniang MDC barim ka Umroi.
Haba phai ha Jirang Constituency, u Bah Lamboklang Mylliem uba la la iakhun na ka NeSDP u la lah ban jop da palat 2496 vote pyrshah ia u kyrtong ka Congress u Bah Barnabas Nongbah bad ruh ia u kyrtong ka NPP, u Bah S Sohtun uba dei u President barim ka RBYF, ka kane ka jingjop u Bah Lambok ka dei hadien ba ula ioh ka jingkyrshan ka ba radbah na u MLA ba rim ka Jirang u Bah JD Rymbai bad ruh na u Bah Indaris Maring, President barim ka NCP Jirang Block.
U Dr DD Lapang ula pynpaw ia ka jingkmen kaba khraw hadien b aula ioh biang ia ka jingjop badon burom bad ula ai khublei kyrpang ia ki paidbah nongkyrshan ka Nongpoh Constituency kiba la ai biang ka jingshaniah kum u nongmihkhmat bad ka jingieid ha ka seng Congress, ‘kane ka jingieid bad ka jingshaniah u paidbah kan long ka jingkyrkhu kaba khraw ia ka Nongpoh Constituency bad ia ka Jylla hi baroh kawei.
Kumjuh u Bah Dorphang MLA ba thymmai ka Mawhati Constituency u la pynpaw ia ka jingkmen ban jingaikhublei kyrpang ia baroh ki paidbah nongkyrshan bad ruh ia kito ki bym shym la kyrshan ia u ha kane ka kynti, bad u la kular ruh ba lyngba kane ka jingjop shen ka Mawhati kan ioh lad ban iohi ia ki jingkylla ha ka liang ka roi ka par.
Ha kajuh ka por u bah Dorphang ula phah iaka khubor sha ka seng HNLC ban kyrpad ia baroh ki nongkitkam ka seng kiba la iatreilang bad u ba kin sngewbah ban wan shakhmat ban im ka jingim kaba thymmai da ka jingiakren sngewthuh jingmut bad ka sorkar thymmai namar ba ka jingsuk jingshngain ka Ri bad ka Jaidbynriew kam shong ha ki tiar ialeh hynrei ka dei lyngba ka jingiakren sngewthuh kaba lah ban pynurlong ia ki jingangnud.(SP News)
