Shillong, Rymphang 20: Lada ki Seng UDP ki ieid ‘jaidbynriew’ kylli balei tang hadien 12 bnai ba ha u snem 2009 la khyllem ka Sorkar Meghalaya Progressive Alliance (MPA) ba la ialam da u Dr Donkupar Roy ? Ia kane ka jingkylli la buh da u Dr Mukul Sangma, Chief Minister, ka Sorkar MUA ba la ialam da ka Seng Congress, hakhmat u paidbah ha Mawngap. Ia ka jingkren u Dr Mukul Sangma Chief Minister la pynkylla Khasi da u Bah John F Kharshiing,
U Dr Mukul Sangma, Chief Minister, u la ong ba u la ioh jingtip ba ka daw ba katei ka Sorkar khlaw khawlang ba la ia synrop lang ki seng riewlum bad ka BJP, NCP ha katto ka por ka long ka jingiaknieh ‘tender sam um kaba wan na ka JNNURM kaba iadei bad ka Greater Shillong Water Supply Scheme’ kaba da ki crore hapdeng u Myntri Urban Affairs na ka KHNAM ha kato ka por bad u Myntri PHE uba na ka BJP. U la ong ba ka jingiaknieh ban ai tender ka la poi haduh u pud ba khyllem ka Sorkar u Dr Donkupar Roy ha utei u Myntri Urban Affairs uba pyrta mynta na ka seng UDP na ka bynta ka ‘jaidbynriew’.
U la ong ba katei ka jingiaknieh ka la pynslem ‘delay’ ia ka jingtreikam jong katei ka project kathaduh ba mynta ym lah ban ioh scheme sam um thymmai na ka Sorkar India tang namar ka jingpynslem ha katei ka jingiaknieh. U la ong ba ki paidbah ki la dei ban sngewthuh haduh katno ki katto katne ki nongialam ki wan ban pynthame paidbah ha ka kyrteng ka ‘jaidbynriew’.
U la ong ba kim donkam ki Ain kiba khlain bad ka Sorkar ka dang don hapdeng ka jingiakren kaba sani bha ban iakren halor ka jingpynbeit thymmai ia ka Sixth Scheduled. U Dr Mukul Sangma, u la ong ba ym donkam Bah Bindo Lanong, ym donkam Bah Paul Lyngdoh, bad Ym dei u Chief Minister, ym dei ki MLA ym dei ki MDC ym dei ki CEM hynrei u la ong ba kadei ka Ain Sixth Scheduled kaba iada ia ki jaidbynriew rit paid kum ki khasi, jaintia bad garo.
U la ong ba kitei ki seng riewlum ki kawang maw ia ka Sorkar jong u namar ba ka Sorkar jong u ka skhem bad kaba iaineh.
U la ong ba haba phai sha ka roi ka par u la ong hato bishar ia ki kam haba san snem mynshwa ka mang tyngka ka Sorkar jylla Meghalaya ka long tang hapoh 900 lane 1200 crore hynrei mynta ka Sorkar ba la ialam da ka Seng Congress namar ka jingtrei sted bad namar ba minot ka Sorkar jong u ka la lah ban ioh ia ka bhah mang tyngka kaba haduh Rs 4151 Crore, u la kyrpad ia ki paidbah ba kin long kiba iai neh namar shen kin wan ki jingkylla kiba khraw hapoh ka jylla.
U la ong ruh ba mynta ki officer kiba juh shong office tang haduh 5 baje ki iai trei ban pyndep kam bun sien haduh 8 baje janmiet.
Shuh shuh u Chief Minister, u la ong ba ka sorkar ka la pynkhreh ia kawei ka scheme bad ka Sorkar Alberta, Canada, na ka bynta ban iarap ia ki 5000 (san hajar ) ngut ki longiing ha ki kam ri jingri (ri syniang, ri syiar, ri masi, bad kiwei kiwei ) bad yn pyntrei shwa ia katei ka scheme ha ki lai tylli ki C&RD Block kata Umsning, Mylliem, bad Mawphlang bad yn sa bteng biang sha kiwei ki Block ha ki snem kiban wan.
U la pyntip ba ka Sorkar ka la pynkhreh ban pyntrei ka scheme ban pynjanai bad ban pynbha ia ki ba bun tylli ki Higher Secondary School lyngba ka jingiarap na ka Asian Development Bank kaba la khot haduh 600 hynriew spah crore kaba kynthup ruh ia ka jinghi kai kaba kyrpang na ka bynta ki nonghikai.
U la ong ba ka por ka dawa bad ka Sorkar Jylla ka la pynkhreh ban aiti shuh shuh ki tnad Sorkar hapoh ka jingpyniaid jong ki District Council bad u la ong ba ki District Council ruh kin hap long kiba la khreh ban buh ryntih ki rukom treikam jong ki ban ia beh katkum ka por kaba mynta.
Halor ka jingkynnoh jong u Bah Paul Lyngdoh Working President UDP, ba ka jingpynkup bor thymmai ka long tang na ka bynta ka Garo Hills Autonomous District Council, u Dr Mukul Sangma, Chief Minister, u la ong ka long kaba sngew samut bad imat u Bah Paul Lyngdoh, um juh pule kotkhubor u Chief Minister u la ong ba ka long kaba lyngoh shisha ba utei u rangbah nongialam um tip ia ka kper la jong bad lehse um pat pule bha ia kaei kaba don hapoh ka Sixth Schedule.
U Dr Mukul Sangma, Chief Minister, u la pynshai ba lada pynkup bor ia ka Garo Hills Autonomous District Council kiwei kum ka Khasi Hills bad Jaintia Hills Autonomous District Council ruh kin ioh ia ka juh ka jingmyntoi namar ngi don hapoh ka juh ka jylla.
U la kyntu ia ki paidbah ban ai ka jingkyrshan kaba pura ia i Bah L Blah, MDC uba la trei bha ia ka thain Mawphlang bad kumjuh ia kiwei kiwei ki kyrtong MDC na ka seng Congress ha kane ka District Council Election khnang ba kan wanrah ia ka jingtrei kaba jan hapdeng ka District Council bad ka Sorkar Jylla.
Na ka liang u Bah John F Kharshiing, ha ka jingkren u la ai khublei ia i Bah L Blah, MDC namar ka jingtrei shitom na ka liang jong u ban pruid dak ia ka Village Administration Bill bad u la kyrpad ia ki paidbah ban ai lad ia u Bah L Blah ban pyndep shwa ban sain dur ia kiba bun ki ain hima, ki ain shnong kiban long ka jingiada ia ka Riti ka Dustur jong ka jaidbynriew.(SP News)
