Shillong, Lber 25: U Chief Executive Member (CEM) jong ka KHADC u Bah Ardent Miller Basaiawmoit haba jubab ia ka zero hours kaba la wanrah da u u Bah Lamphrang Blah na ka seng Congress halor ka jingkynnoh ba kala don ka jingbam sap ha kaba ia dei bad ka Heritage Village bad ka Monolith Festival ha Mawphlang.
Haba jubab hapoh ka iing dorbar mynta ka sngi u Bah Basaiawmoit u la ong ba na ka liang jong ka Executive Committee, ka kwah ban ia shai halor katei ka khubor la ka dei kaba shisha ne kaba bakla. Na ka liang jong ka ARPA kam pat shim ia kano kano ka rai la yn phah tohkit ne em, hynrei u la ong ba ka EC kan sa shong shen ban ia kren ia kane ka kam la yn phah tohkit ne yn sa ngeh.
Na ka liang jong u CEM u la ong ba kane ka EC kaba mynta ka kwah ban trei ia kano kano ka kam ha kaba shai khlem da don kano kano ka jingbuhrieh. Halor ka jingdawa la ia ka monolith festival yn dang iai bteng ne pynsangeh noh u CEM u la ong ba ia mynta ym pat lah ban rai.
Haba kren halor kane ka zero hours na ka liang jong u nongialam ka liang pyrshah u Bah PN Syiem u la ong ba kum ka KHUDA ka sngewsih ban iohi ia kane ka jingkynnoh bad ka jingwanrah ia kane ka mat jingiakren ka long ban ioh ia ka jingshai ka EC halor katei ka jingkynnoh.
Halor ka jingkynnoh ia u Deputy CEM ba mynta na ka liang jong u CEM u la ong bay m lah ban tei pop ha u EM barim namar ka rule ka kren shai kdar ba ia kano kano ka kam kaba leh da ka EC ka dei bna long lyngba ka jingtip jong u CEM.
U Bah Pynshngian u la ong ba ia ka pisa la mang da ka 13th Finance commission kaba long T.5.97 klur tyngka ym kumba ka la mih ha ka kot khubor. Na katei ka jingmangpisa ka EC kaba rim kala siew ha kaba ia dei bad katei ka kam ka dang long tang T.2.80 klur kumno lada kynnoh ba ka don ka jingia bamsap.
Na ka liang jong ka KHUDA ka long kaba la kloi ban pdiang ia kano kano ka jingtohkit lada ka don ban ia shai bad ban sait khuid ia kaei kaba la shah kynnoh. Kaei kaba la mih ha ka kotkhubor ka dei tang ka DPR. La ong ba u Deputy CEM u ba mynta u dei u Em ba dei peit ia kane ka kam ha ka EC kaba rim.(SP News)
