Shillong, Iaiong 19: Baroh ki seng sain pyrthei ha kane ka jylla Meghalaya ki sngap jar jar ha kaba ia dei bad ka jong ia soi ka sorkar India bad ka Bangladesh ha kaba ia dei bad ka jingia ai ia shim ia ki jaka ba don ka jingiakam mar kylliang hapdeng kine ki ar tylli ki ri.
Katkum ka jingiateh kular hapdeng kine ki ar tylli ki ri kaba la ia soi ha ka 6 tarik Nailar 2011, ha kaba u myntri rangbah ka jylla Meghalaya u Dr Mukul Sangma, u Bah Paul Lyngdoh, U Bah A L hek bad u Bah Bindo ki ia don lang ha katei ka jingiasoi kular.
Ki paidbah nongshong shnong jong ka jylla Meghalaya ki kwah ban tip mynta aiu ka sorkar ka don ban ong halor ka jingduh ia ki jaka pauta kiba dei na kane ka jylla ba kin poi noh sha Bangladesh lada ka parliament jong ka Ri India ka pdiang ia katei ka jingiasoi kular.
Kumba ka long mynta ka BJP, ka TMC, ka AGP ka pyrshah ia kane ka jingiasoi jong ka sorkar India bad na ka liang jong u nongialam jong ka AGP u Prafulla Kumar Mahnata u la ia wer ia kiwei ki seng sain pyrthei jong ka Ri India ba kin pyrshah lada ka billka wan hapoh parliament.
Katkum ki jingtip kiba la ioh da u SP News Agency ki iathuh ba ki jaka kiba ka India ka don kiba don ka jingiaknieh hapdeng ka India bad ka Bangladesh ka long 559 hektar katba ka Bangladesh ka don tang 40 hektar. Hynrei ka Bangladesh mynta kan ioh ia ki jaka na kane ka jylla Meghalaya kan long haduh 281 hectar bad ki jaka ban leit sha Bangladesh ki long naduh Lobachera sha duh Lyngkhat.(SP News)
