Shillong, Nohprah 09: Ka working president jong ka Meghalaya Pradesh Congress Committee (MPCC) ka Deborah Ch Marak ka la ong ba ka party congress ka dei ban shim ia kane ka jingsneng na kane ka jingshah rem ha kane ka election kaba dang shuidep ha ki saw tylli ki jylla ha ka Ri India.
Kane ka nongialam congress ha kane ka jylla Meghalaya ka pdiang ia kane ka jingshah rem jong ka seng ha ki saw tylli ki jylla ka, Delhi, Rajasthan, Madhya Pradesh bad Chhattisgarh, ka la kubur ba ka seng ka la leh sniew ha kane ka election hynrei ka la ong kum kine ki juh jia ha ka sain pyrthei.
Haba ia dei bad ka jingshah rem ha Rajasthan ka jingrem na ka dei na ka jingialeh markynti hapdeng ki para Congress, kum kane ka jia ruh hapoh jong ka seng BJP. Kane ka dei ka politic kaba ym lah ban kiar ka jia bad kan dang iai jia.
Na ka liang jong kane ka nongialam seng Congress ha Meghalaya ka la ong ba ka seng mynta ka hap ban pynthymmai ia ki rukom trei kam ki jong ka shuwa ba ka election sha ka iing dorbar Lok Sabha kan wan. Kane ka jingshah rem baroh ka dei na ka daw jong ka jingkhein shngian sha ba palat na ka liang jong ka seng. Kane ka dei ka kren jong ka working president ha dien ba ka seng ka la shah rem ha ki saw tylli ki jylla.(SP News)
