Shillong, Rymphang 15: U Myntri Rangbah ka Jylla u Dr Mukul Sangma ula kam ba ka sorkar kaba synshar da ka seng Congress ka wanrah ia shibun ki project bad ki prokram ki bapher bapher na ka bynta ban pynim iaki paidbah nongshong shnong ka Jylla khamtam iaki thaiñ nongkyndong. Da kaba ula kop ruh ba ha kane ka kynti ka congress kan ioh ban synshar hi khlem da khleh milai jaktung.
Haba kren ha ka jingialang jongka seng hynne ka sngi ha madan Polo halor ka jingwan jurip da u Prime Minister, u Dr Mukul ula ong ruh ba ki mat treikam ba hakhmat eh jongka seng ka dei halor ka jingsahdien bad ka jingduk bad dei halor kane ka nongrim ba ka sorkar kaba ioh synshar da ka Congress ka wanrah ia shibun ki prokram bad ki skhim bapher bapher na ka bynta ka thong jongki paidbah.
“Ngi la lah ban wanrah ia shibun ki jingkylla,”ong u Mukul da kaba bynrap, ba ka la dei ka por iaki paidbah ba kin rai ba kum kino ki sorkar kaba ki kwah bad dei ka Congress kaba dei ka party ka ba neh bad baskhem.
“Kam pat don ka sien ba ka Jylla Meghalaya ka thaw sorkar khlem ka Congress,” ula ong, da kaba bynrap ba kiwei pat ki seng riewlum kiba wan ha ka bor sorkar kim lah ban ialam slem hynrei ki kyllon noh tang da ki bnai ne shi snem.
Ula kyntu iaki paidbah ki dei ban vote iaka Congress kaba don iaka jingkitkhlieh bad ka sorkar kaba larkam ym kum kiwei.
Katba na ka liang u General Secretary ka AICC bad uba peit ruh iaka Jylla Meghalaya, u Mukul Wasnik ula pynbna iaki katto katne ki project kiba la wanrah da ka seng Congress ba kynthup iaka NEIGRIHMS,NIFT, NIT ki surok bad kiwei de kaba kila ai sha ki paidbah.
“Lada ka Meghalaya ka sah shadien, ka ri India kam lah ban kiew shaphrang,” ong u Wasnik bad shuh shuh ula ong ba ka Congress kaba la synshar iaka sorkar kmie kan dang iai bteng ban ai iaki lad jingiarap sha ki paidbah kane ka Jylla ha ka pateng kaba mynta bad ka ban dang wan.
Katba na ka liang u President ka MPCC bad uba dei ruh u Chief minister barim ka Jylla u Dr DD Lapang ula kyrpad ia u Prime Minister ka ri u Manmohan Singh ba un ai ki lad jingiada kiba kyrpang na ka bynta ki samla pule ka Jylla Meghalaya bad ruh iakiba samla jongka thaiñ shatei lam mihngi bad ruh iakiba leit trei ha ki jaka Pdeng ka ri ba kin ioh iaka jingiada kaba biang.
