Shillong, Kyllalyngkot 08: Ka Grand Council of Chiefs of Meghalaya kaba kynthup ia ka (Dorbar Ki Khlieh Nongsynshar Ka Ri Hynniewtrep; Federation of Khasi States; Ki Sirdarship, Ka Dorbar ki Dolloi, bad ka Council of Nokmas), kaba la ia kynduh mynta ka sngi 8 tarik January 2013, ha Shillong, hadien ki jingiakynduh kiba bun halor ka jingsah teng wat hadien 63 snem (26 January 1950- 26 January 2013) ka jingtreikam ka Constitution Ri India (kaba la dep pynkylla, pynbeit (amend) palat 100 sien), bad haba ki Dorbar Shnong, Raid bad Hima bad ki dulir jingiateh bad ki jingkular Instrument of Accession & Annexed Agreement – 16 July 1947, 9, 13, 14 August 1947, 15 December 1947 bad 17 August 1948 (IOA & AA), kiba la mynjur bad soi hapdeng ka Sorkar India bad ki Hima Khasi States kim pat paw dak – katkum ka Indian Independence Act 1947, hapoh ka Constitution Ri India, bad kum ka jingbteng ia ki rai jong ka Dorbar Ri kaba nyngkong 14 January 2004, Smit, Hima Khyrim, kaba ar 6 October 2007 ha Hima Mawphlang bad kaba lai 14 November, 2011, ha Asanangre, West Garo Hills, kumta hadien ka jingiatai kaba sani ka la shim ia kine ki rai.
ban pynpaw ia ka jingsngewnguh ia u Paiem Phrester Manik Syiemlieh, Syiem Hima Nongkhlaw bad ka Dorbar Hima Nongkhlaw kiba la pdiang ia ka jingtyrwa na ka liang ka Grand Council of Chiefs of Meghalaya bad ka Dorbar Ki Khlieh Nongsynshar Ka Ri Hynniewtrep, ban lum bad Khot ia ka Dorbar Ri kaba kyrpang kaba saw (4th Special Session of Peoples Parliament) ha ka por 10.00 baje mynstep 13 tarik February 2013, ha Madan Tirot Sing, Mission Mairang, Hima Khadsawphra /Hima Nongkhlaw, ban ia kren halor ki hok kum ba la ia kut.
ban ioh ia ka report ha ka Dorbar Ri kaba Kyrpang, – kaba saw ( 4th Special Session of Peoples Parliament) ia ka jingiaid jong ki kam khamtam halor ka jingpynksan ka rai bishar ha ka 26 April 2012, na ka bor National Commission for Schedule Tribes,(NCST), Sorkar India, halor ka dorkhas na ka Dorbar Federation of Khasi States kaba la bthah mynta ia ka tnad Ministry Tribal Affairs, Sorkar India ban leh ia kaba donkam ban peit khmih ban pyndep ia ki jingkular, bad ki jingiakynduh ruh ia ki long heh jong ka Sorkar India ha ka 7, 8 bad 9 tarik June 2012
ban bteng ia ka jingdawa kaba la shim ha ka Dorbar Ri kaba nongkong kaba ar bad kaba lai ha kaba la dawa ia ka Article kaba kyrpang lane da ka Schedule kaba khadlai (Thirteen Schedule ) katkum ki dulir ki jingkular IOA & AA
Ban kyntu ia ki bor Sorkar Jylla bad pynbeit kyrkieh bad ban pyntreikam (enforcement) ia ka Meghalaya Transfer of Land Regulation Act 1971, ryngkat ki jingiai jingmut jong ki sengbhalang, ki trai jaka bad ki Khlieh Nongsynshar Hima (stake holder) ha shwa ban pyntreikam ia ka Industrial Policy, kaba dang shu pynbna.
ban kyntu ia ka Sorkar Jylla bad Sorkar India ban mang kyrpang ia ka bhah na ka budget jong ka Sorkar Jylla sha ki 54 Hima /Elaka ha Khasi Hills, 19 Elaka ha Jaintia Hills bad na ka bynta ka Council of Nokmas kum shibynta ban kyrshan ban nang kyntiew ia ki iktiar jong ki ha ka ba ia dei bad ka synshar, khaddar, bishar bad ha kaba pyntreikam ia ki Kam pynroi (Development Schemes), ha ki Khun ki Hajar bad ha la ki Hima /Elaka.
Ba ka Dorbar Ri ka sngewdei ban pypaw ia ka jingpyrshah sha ki bor Sorkar ia ka jingeh namar ki Ain Sorkar kiba mih na Parliament kum ka Indian Registration Act 1908, The Indian Forest Act 1927, Ka Forest Conservation Act 1980, ka Land Acquisition Act 1894, The Mines Act 1952, Coal Mines Nationalisation Act 1973, bad kiwei kiwei, kiba long pyrshah ia ki jingiateh bad ki jingialukar katkum ki dulir IOA & AA, khlem jing pynrkhat kumno kin ktah ia ka Hok ki khun ki hajar ha ki Hima bapher bapher hapoh kane ka Ri baieid jong ngi.
Ban kyntu jur ia baroh ki khun ki hajar na ki Shnong, ki Raid bad ki Hima/Elaka ban ia mih paidbah ban poi sha ka Dorbar Ri ha ka por 10 baje myntep, 13 tarik February 2013 ha Madan Tirot Sing, Mission Mairang, Hima Khadsawphra/Hima Nongkhlaw.
Kiba la ia don lang ki long Syiem Hima Khyrim, Syiem Hima Maharam (President Federation of Khasi States), Syiem Hima Nongkhlaw(Vice-President, Federation of Khasi States), Lyngdoh Hima Mawphlang, Syiem Hima Langrin, Sirdar Hima Mawdon (Secy, Federation of Khasi States), Sirdar Hima Nongpoh, Myntri Nongrum, Hima Sohra, Syiem Khynnah Hima Nongkhlaw, Myntri Lyngdoh Nongbri, Hima Nongkhlaw, Syiem Hima Malaisohmat, bad kiwei kiwei.(SP News)
