Smit, kyllalyngkot 30: Katei ka Dorbar la pyniaid da u
, ha ka jingiadonlang u Bah John F Kharshiing, Co-Chairman, MIDC, Chairman, Grand Council of Chiefs of Meghalaya, Spokesperson, Federation of Khasi States, u Bah G Mylliemngap, Lyngskor, Hima Khyrim, Bah Kynsai Manik Syiem, Sordar Smit, Bah B Sohtun, Myntri Hima Khyrim, Bah J Khongwir, Myntri Hima Khyrim, Bah H Mylliempdah, Myntri Hima Khyrim, Bah T Nongrum, Myntri Hima Khyrim, Bah M Lyngdoh, Lyngdoh Raid Mawshai, Hima Khyrim, bad bun ngut ki Sordar Raid, Basan Raid, Syiem Raid, ki Lyngdoh Raid, Rangbah Shnong, ki Secretary Shnong, ki Riew Rangbah, Ki Nongialam Samla bad ki riewkhmat, na ki Shnong bad ki Raid bapher bapher jong ka Hima Khyrim, ban ia kren halor ka Dorbar Ri kaba Kyrpang bad kaba Saw (4th Special Peoples Parliament).
Katei ka Dorbar hadien ba la ioh jingkren na u Paiem Dr Balajied S Syiem, Syiem Hima Khyrim bad ka jingpynshai na u Bah John F Kharshiing, bad hadien ka jingai jingmut jong kiba bun ngut, ka Dorbar ka la rai ban ia mih paidbah baroh naduh ki Dorbar Kur, ki Dorbar Shnong, ki Dorbar Hima, ki Sengbhalang, ha ryngkat ki khun ki hajar ban ia mih paidbah ban poi sha ka Dorbar Ri kaba Kyrpang bad kaba Saw, (4th Special Peoples Parliament), kaban long ha ka 13 tarik 2013, ha Mairang, Hima Khadsawphra(Hima Nongkhlaw).
Haba kren ha katei ka Dorbar u Lyngskor Hima Khyrim u la pynsngew ba ha ki por kiba kham mynshwa la bun bun snem la don ka jingpyrshang ban wad kumno ban ioh ia ka jingithuh da ka Ain ia ki jingsynshar tynrai, bad u la pynpaw ba ha kaba nyngkong um shym la shai ia ka jingiaid jong kane ka jingiakhi, hynrei u la kubur ba mynta haba iohi ia ka jingianeh jong u Bah John F Kharshiing, ha kane ka phang, bad khamtam haba iohi sa kine ki kot ki sla ka shithi na ka National Commission for Schedule Tribes (NCST) Sorkar India, u la ong ba u sngew ioh jingkyrmen bad ai khublei ia ka jinglah jong u Bah John F Kharshiing ban lap ia ka lynti kumno ban sei bad buh ia kine ki hok hakhmat ka Sorkar India, bad u la ong ba mynta la donkam ban kyrshan tyngeh ia kane ka jingialeh ba kan poi sha ka thong haduh ban da paw kine ki dulir hapoh ka Constitution Ri India.
Na ka liang u Bah John F Kharshiing, Co-Chairman, MIDC, Chairman, Grand Council of Chiefs of Meghalaya, Spokesperson, Federation of Khasi States, u la ong ba ka kam ka la sdang khih haduh ba ka tnad National Commission for Tribal Affairs, (NCST) Sorkar India ka la shim ia ka rai ban bthah ia ka Ministry Tribal Affairs, Govt of India ba kan leh ia kaba donkam ban pyndep ia ki jingkular bad ki jingiateh kiba la ia teh hapdeng ka Sorkar India bad ki Khasi States.
U Bah John F Kharshiing, Chairman, Ka Dorbar Ki Khlieh Nongsynshar Ka Ri Hynniewtrep, u la ong katba u Myntri Rangbah Duh (President) Nelson Mandela, ka Ri South Africa, u la shah set patok haduh 25 snem ban ioh ia ka jingsynshar laitluid, hangne ha Ri jong ngi pat ka la shim por 64 snem ban ioh ia ka shithi rai bishar na ka tnad NCST ha ka 26 tarik April 2012, kaba la pynksan ia ki dulir Instrument of Accession and Annexed Agreement 17 August 1948.
U Bah John F Kharshiing, Chairman, Ka Dorbar Ki Khlieh Nongsynshar Ka Ri Hynniewtrep, u la ong ba Ngi iai bteng ia ka jingdawa ban ioh ka Council kaba kyrpang na ka bynta ki jingsynshar tynrai khnang ban ioh ka jingiada halor kine ki Hok ki Riti ki Dustur jong ngi hapoh ka Constitution ka Ri India.
U la ong ruh ba ka long ka khubor kaba sngewtynad ba ka Sorkar Jylla Meghalaya ka la mynjur hapoh ka Dorbar Thaw Ain ha u March 2012, ia ka ain Meghalaya State Finance Commission Act 2012 kaban bishar kumno bad katno yn ai bhah ia ka pisa sha ki Dorbar Shnong, Dorbar Raid bad Dorbar Hima, bad u la kyntu jur ia baroh ki Shnong bad ki Hima ba kin long kiba la khreh ha ka liang ka rukom buh jingkhien ha kane ka bynta.
Haba pynwai ia ka Dorbar u Syiem Hima Khyrim, u la kyntu jur ia baroh ki Nongsynshar hapoh ka Hima naduh u Lyngskor, ki Myntri, Lyngdoh, ki Syiem Raid, ki Bongthe Raid, ki Sordar Raid, ki Lyngdoh Raid, ki Sordar Shnong, ki Rangbah Shnong, ki riewkhmat, samla ban ia mih paidbah bad ban poi sha ka Dorbar Ri kaba Saw bad kaba kyrpang ha ka 13 tarik February 2013 por 10 baje mynstep ha Mairang, Hima Nongkhlaw.(SP News)
