Shillong, Naiwieng 15: Ka dorbar tlang jong ka iing dorbar thawain ka jylla ka ban long saw sngi lynter kan sdang ha ka 11 tarik jong u bnai Nohprah bad kane kan long ruh ka dorbar kaba kut jong kane ka iing dorbar kaba mynta namar ka jylla kan sa leit sha ka Election sha ka iing dorbar kaba khyndai.
Ha kane ka iing dorbar kaba phra mynta la iohi ba mar ia dep ka election ka jylla ka la ioh ia ka sorkar khleh khaw lang namar ym shym don kawei ruh ka seng sain pyrthei kaban ioh ia ka jingsynshar kaba marwei.
Ka sorkar kaba myngkong la ioh ban bat da ki seng riewlum ha kaba la kyrshan da ka seng NCP hapoh ka jingialam jong u Dr Donkupar Roy hynrei kane ka sorkar kan shym la neh bad ka la khyllem noh ha kane ka sorkar ka kynthup ia ka Nationalist Congress Party(NCP) (14 MLAs),United Democratic Party (UDP) (11) MLAs,Hill State People’s Democratic Party (HsPDP) (2 MLAs), Khun Hynniewtrep National Awakening Movement (KHNAM) (1 MLA),Bharatiya Janata Party (BJP) (1) MLA bad 2 ngut ki independents (2 MLAs).
Ha dien ka jingkhyllem noh ka sokar jong u Dr Donkupar Roy la wan u Bah DD Lapang kum u myntri rangbah ka jylla na ka seng Congress ha kaba ka UDP ka la leit ban ia trei lang noh bad ka seng Congress da kaba ieh noh ia ka NCP kane ka sorkar kaba la ialam da u Bah Lapang kam shym la neh slem ka la mih ia ka jingiakhih hapoh ka seng Congress ha kaba la wanrah ia u Dr Mukul Sangma kum u myntri rangbah u ba dang neh haduh mynta.(SP News)
