Shillong, Rymphang 14:Ka CSWO hapoh ka jingialam ka Kong Irene Hujon kum ka President, ka kyrmen ba ka eksamin MPS (Meghalaya Police Service) ka ban long mynta u bnai da ka MPSC kan long kaba khuid ba suba bad ka ban pyniaid beit-iaid ryntih kat kum ka bor jong ki nongpyniaid ia kane ka eksamin, ym shuh ba kan long kaba thurmur.
Na ka liang ka seng, ka kyntu jur ia ki bor ba dei peit halor kane ka kam ba kan ym don kano kano ka jingleh shiliang khmat iano iano ruh bad ka dei ruh ban long da ka jingbishar hok, khnang ba kito baroh kiba dei hok shisha ban ioh ia ka kam, kin ioh khlem da don kano kano ka jing pynbam pisa lane da kano kano ka jingleh donbor da ki nongmihkhmat ne ki heh ophisar, bad ba kan ym don ruh ka jing pynkylla ne pyndam ia ki marks da kaba shu leh thok-leh shukor.
Hadien ba la mih ki jingkynthoh na kiba bun pyrshah ia ka MPSC ha kaba iadei bad ka thung kam-thung jam bad ki kam thurmur jong ka. Ka seng ka don ia ka jingsngewkhia ha kaba iadei bad kane.
Kumta nangne shakhmat, ka kyntu kynpham ia baroh ki Department ba lada don kano kano ka jinglait kam, ki dei ban da pynbna lyngba ki advertisement ha ki kot khubor baroh ym ban shu thung kam sop sop, khnang ba ki nongwad kam-wad jam ruh kin ioh ia la ka jong ka hok.
Ka seng ka buh ruh ia ka jingkylli ba lada don biang kano kano ka jingleh bym hok lane ka mih biang ka kynrum kynram ha ka thungkam-thungjam, ka bor aiu kaba dei ban khmih bad tuklar halor kata? ka la kylli, Hato, dei ka CBI ne kata ka High Level Scrutiny Committee ? Namar kine ruh kim pat lah ban ai ka jingsghaniah kaba thikna.
Ha ka juh ka por, ka seng ka ai ka kyrkhu-kyrdoh, ka kitbok-kitrwiang ia baroh ki khun samla kiba wad kam kumjuh ruh ia kito ki samla kiba don ha ki exam bapher bapher ba kin ioh ia ka jingjop. Ia kane ka kyrwoh la pyllait da Kong Irene P. Hujon, President CSWO.(SP News)
