Shillong, Nailar 14: Ka seng kaba dei peit ia ka hok long briew man briew ha kane ka jylla Meghalaya ka Meghalaya Peoples Human Rights Council (MPHRC) ha ka jingialang jong ka Central Executive Committee kaba la long mynta ka sngi ka la pdiang sngewbha ia ka rai jong ka sorkar ban thaw noh ia ka State Human Rights Commission.
Ban buh ia ka State Human Rights Commission ka dei ka jingdawa kaba la slem bha naduh u snem 1996 ba la seng ia ka MPHRC ha ka jylla ha ka por kaba u Salseng Marak u long u myntri rangbah ha katei ka por, hynrei ha katei ka por u Marak u la kwah ban don da ka Human Right Commission na ka bynta ka dong shatei lam mih ngi jong ka Ri India tang kawei.
Ia kane ka jingthmu la hap ban pyndam noh namar ka jylla Manipur bad ka jylla Assam ki la thaw noh ia ka Commission kaba la ka jong. Na ka liang jong ka MPHRC ka pdiang sngewbha ia kane ka rai jong ka sorkar bad kane ka Commission ka dei ban don ia ka bor katkum ki kyndon, la ong u bah Dino DG Dympep.
Ka jingdon jong kane ka Commission kan long ka jingkyrkhu ia ki paidbah jong kane ka jylla ha kaba ki briew ki lah ban wad ia ki lad jingiada lada ka don kano kano ka jingsngew ba ki la shah lehbein ha ka hok long briew man briew jong ki bad kane kan pynsuk ia ki paidbah.
Na ka liang jong ka MPHRC ka iohi ba kane ka commission kaba ka sorkar ka la rai banbuh ha kane ka jylla kan long ka jingkieng kaba pyniasoh ia ka sorkar bad ki paidbah ha kaba ia dei bad ka hok long briew man briew.(SP News)
