Shillong, Naitung 22: Mynta ka sngi u Bah B Ryntathiang katba u dang dihsha ha kawei ka dukan kaba don ha Angeli kaba la tip kum ka Shree Bajrang Mistan Bhandar, 29 A Contonment, Shillong ula kyndit ban shem ba ha u jingbam Rosgola, ba ki bam la lap ia u lyngkhot Bitor uba donlang hapoh une u jingbam.
Katkum ka jingiathuh utei u bah Ryntathiang, u la ong ba ia utei u lyngkhot bitor, la lap na utei u jingbam ba hashwa ba un bam, hadien kane ula iathuh ha u Trai kane ka dukan bad u la leh bym suidniew ia ka jingiathuh ka jongu, “Utei u Trai ula kyntait ban wan peit bad ngam banse ban pyntip sha ki sengbhalang halor kane ban tuklar lem ioh ka wanrah ka jingma bad jingmynsaw iakiwei ki paidbah kiba bam ba dih ha kane ka dukan,”u la ong.
Hadien ba une u trai ula iohsngew ba une u rangbah ula pyntip sha sengbhalang ula phet noh na katei ka jaka. Hynrei na ka jingmynthi utei u Trai ha ka por ba u iathuh ia ka jingjia, utei u Rangbah u la ong ba um banse khot iaki sengbhalang khnang ba kan long ruh kum ka khubor kaba maham ia ki briew ba kin husiar haba ki leit bam leit dih ha kiRestaurant ba kin lait na ki jingma jingmynsaw.
U Bah KS Rani President, HYNF Western Region, haba iakren bad ki nongthoh khubor, hadien ba ula wan ban tuklar ia kane ka kam, ula pynpaw iaka jingsngewbynniaw halor kane ka jinglehtorti kane ka dukan bad kaba wanrah ka jingma bad jingmynsaw iaki briew kiba wan ban dihsha ha kane ka dukan.
Na ka liang ka jongu lem bad ka seng kan sa leit ban ia kynduh ia u Food Inspector lashai ka sngi ban pyni ia utei u jingbam uba don ia u lyngkhot bitor bad kala dawa ruh ba dei ban khang noh mardor ia kane ka dukan namar ka long ka jingma iaki paidbah.
“Ym tang ka jingdon u bitor ha u jingbam (Rosgola) hynrei ka jingma ka long ba bun ki jingbam kila buh beit halor miej khlem kano kano ka jingiada na ki skain bad ki tdem, bad ruh kaba kham syier iaki paidbah ka dei ka jaka shet jingbam, namar ba ka don ha ka bynta kaba hakhmat ka dukan bad kam don kano kano ka jingker kaba long ka jingma iaki briew,” ong u Bah Rani da kaba bynrap, “lada ki Food Inspector kim leh eiei ia kane ka dukan ka seng kam banse ban khang khyder hi noh ia kane ka dukan.(SP News)
