Shillong, Risaw 24: Ka seng ICARE kala pynshai paidbah ba ka ieng
halor ka nongrim ban pyrshah ia ka jing pakhang shnong jubor namar lada khah khah than eh bad jlan palat ki ktah ia ka leit ka wan, ka kamai ka kajih khamtam jong u duk u suk bad ka pule puthi ki samla ha ka jylla.
Ka Seng kam don ei ei ban ong halor ki daw jingiakhih jongno jongno hynrei ka jingialang paidbah ha Khyndailad ha ka 21 tarik mynta u bnai ka long beit ban ring jingmut sha ki rukom iakhih kiba ktah ia ka imlang sah lang jong uba bun ba lang khamtam u sem shiliang kup shiliang. Haba ki kynhun ki pynlong jing iakhih pyrshah ia ka sorkar u paidbah um dei ban kylla dieng shain doh.
Ka Seng ICARE ka pynshai paidbah ruh ba ka la pan bad ka lah ioh ruh ia ka jingtbit na ki bor district ban pynlong ia ka jingialang ha Khyndai lad. La pynlong ia ka jingialangjong ka ICARE naduh ka por 10.30 mystep haduh 12.30 mysngi.
Ka Seng ICARE ka kyntait mardor ia ka jingkynnoh kaba khlem nongrim ba la pynlong ia ka jingialang paidbah ha Khyndailad da ka jingbei pisa ka sorkar. Ka ICARE kam don jingiadei ei ei ruh bad ka sorkar. Ka tamasa jingput jingtem kaba long ha kawei pat ka rynsan ha kajuh hi ka sngi kam dei kaba la pynlong da ka ICARE. La ong u Bah Toki Blah president ICARE.(SP News)
