Jowai, Jymmang 21: Ka Jaintia Youth Federation (JYF) Central Body ka pynpaw ia ka jingsngewkhia ka ba khraw ia ka jingbuhteng ka sorkar Jylla ban pyntreikam noh mardor ia ka ‘Inner Line Permit’ (ILP) kumba la dawa da ki seng bhalang na ka por sha ka por ba ka ILP ka dei lad jingiada kaba paka tam eh ban khanglad ia ka jingioh rung kyrthlep ki mynder ha ha kaneka jylla.
Ban iada ia ka ngi ki rit pait riewlum kiba dei trai jylla, ka ILP ka long kaba donkam eh ban iada na ka jingma ba ka jingiohrung kyrthlep ki mynder ka ktah shibun eh ia ka jylla, khamtam ka jingwan ki briew kiba na bar ka jylla ki ioh lad ban ia knieh ia ka kam ba ki trai shnong ne trai ri ki lah ban leh ha la i jong i jong i bor kum ha ka trei bylla sngi, kam khaii bad kiwei kiwei ong u bah Majaw.
Katkum ka jingshem jong JYF kumba ka long, ka jingwantuid ki nongbylla nongwei shapoh Meghalaya dei na ka daw ba ka sorkar kam shimkhia ban pyntreikam noh ia ka ILP ki ioh laitlan ban rung katba mon sha Meghalaya ban wan ia knieh jakpoh bad ki trai ri trai muluk ym kumba long ha Mizoram & Nagaland ki briew kiba na bar ki hap ban shong tang 15 sngi bad ki hap ban leit phai noh.
U Bah Majaw u ong ka ei kaba u shem da lade ba ka ILP ka treikam ia baroh ki bar Jylla lada dei makna ki riewlum ruh ki hap hi ban apply lada ki don jingthmu ban leit ha ka no ka no ka Jylla ba la pyntreikam ia ka ILP, ha Mizoram “ nga lap da lade ba kum u riewlum ha shwa ba ngan leit nga hap ban pyndap form ba ngan ioh permit ban leit rung hapoh u pud u sam jong ka Jylla Mizoram, kata ruh tang 15 sngi ki ai por bad hap ban wan phai pat.
Ka ei kaba u (Majaw) shem hangne ka long ba lyngba ka jingdon jong ka ILP ka wanrah shibun ki jingkyrkhu ia ka Jylla ha kaba shibun ki samla khlem kam khlem jam ki lah ban iohkam lyngba ka jingdon jong ka ILP ha ka Jylla kumba la leh da ka Jylla Mizoram,
Ka Jylla Mizoram ka buh ia ka tnad treikam jong ka ha Shillong bad ha Silchar, ba kino kino kiba kwah ban leitkai ne leit donkam sha Mizoram ki hap ban leit rung ha office treikam jong ka ILP ryngkat ki kot ki sla ki ba don ia ka address proof kaba biang bad phi hap ban siew T.120 marwei.
Ka jingioh kamai ka Sorkar Mizoram lyngba ka ILP ha ka shisngi ym duna ia ka 50 ngut ki briew man ka sngi, lada shisngi ka iohnong Rs.6, 000, shibnai ki iohnong Rs. 1, 68,000 katno ka jingiohnong bad ha ka shisnem (Rs. 20, 16,000) ka ne ruh ka dang dei tang ka jingkhein kaba
shu shu shim malu mala na ka jinglap jong nga shimet tang ha shillong, ha silchar lei ynnai ia kren ki dkhar kiba leit rung leit mih man ka sngi.
Lyngba ka ne ka pisa ka sorkar Mizoram ka siew tulop ia ki nongtrei kiba peit ia ka tnad ILP ha Shillong kumjuh ha Silchar, ka dei shisha ka jingkyrkhu ka ba khraw ia ka Jylla Meghalaya lada ka sorkar ka pyntreikam noh kloi ia ka ILP kum ba la dawa da ki Sengbhalang,
Ym lah ban len ka ILP kan ai jingiada bad jingshngain ia ka Jylla Meghalaya namar ki briew kiba na bar haba ki wan ki hap ban ioh ia ka inner line permit ka ba biang lym kumta kin ym lah ban rung kulmar ha Meghalaya, hadien ka 15 sngi ki hap ban leit noh sha la shnong la jong bad lada ki dang kwah ki hap ban siew bad pan permit biang ba kin ioh ban wan rung ong u bah Majaw.(SP News)
