Shillong, Jymmang 05: Ka ILP tynrai (original ILP) ka la ‘LIP’. Ki sengbhalang ki la dawa thymmai (divert) ia ka ILP ba kham biang (modified ILP). U Chief Minister lem bad ki Myntri ngeit sneng (Discipline soldiers) jong u ki la ioh pynhiar mynsiem bad pynthanda jabieng ei khyndiat. Ki la kham pyngngad pher na ka jingktha khlieh jong ki. Hapoh hapoh pat ki ia wiat bad phuh sam rkhie rymmuin (inner smiling). Hynrei, hadien ba la jop pynthame bad ioh lape ia ka issue ILP, mynta pat ki sdang ban phaikhmat ban wad jaka lyngba ki buit sianti jong ki ban ioh pynkohnguh bad pynthame sa ia ki nong West bad South West Khasi Hills ba lui lui (innocent people).
Dang shen, u Chief Minister ka sorkar MUA-II u la bthah ia ki Deputy Commissioner (DCs) jong ka West & South West Khasi Hills ba kin wad jaka noh khnang ban ioh buh ktem (camp) ia ki dkhot jong ka kynhun kieng atiar, ka ANVC-B shapoh ka Bri u Hynniewtrep-Hynniew skum. Ki paidbah Khasi Jaintia kim dei satia ban khein sting ia kane ka plan. Katba ka ri lum Garo ki la nang pynkhlain bad nang pynjur ia ka jingdawa jylla lajong (Garo state), kane ka sorkar pat ka la pynap shrip (trapped) lypa ia ki jaka kiba don markhap bad ka Garo Hills.
Ki ong hana, ha kata ka jylla thymmai Garo kan kynthup ruh katto katne ki jaka Khasi kiba dei ha West bad South West Khasi Hills. Ki jaka puta ha Garo Hills ki dang pahuh bad ki lawbah lawsan ruh kyrhai, hynrei kumno pat ban phah wad jaka kyndit sha ki jaka Khasi jong ngi. Nalor ba ki la pynlong ia kane ka thain kaba la ju khein ba ka dei ka ba kham sahdien, kaba la shah nion bad pyndik ha ka Assam na shaneng, na shapoh pat ka don ka ri Bangladesh, sa ka sorkar Meghalaya lajong mynta kan thaw lad na shaphang sepngi kane ka thain.
Hangno kan shan bad kan roi kan kiew irat. Bakla tiak ka West bad South West Khasi Hills ruh kan long kum ka sor Shillong. Ka jingioh kurup jaka ei ka sorkar mynshwa ia ka European ward (Khyndai lad, Kashari etc) bad ki len shipai (Cantonment areas) ha sor Shillong ym dei da ka bor hynrei da ka buit sianti jong ka sorkar dohlieh (British) ha kito ki por.
Hynrei ki longshwa jong ngi ki ju ong ba ki kham sian buit bun shah ki khariong (sorkar Delhi) ban ia ki khar lieh). Man la ki tnad sorkar (Department) ka dei ka hok jong ki Minister (Minister concerned) ban tuklar ia ki department jong ki. Mynta pat u Minister jong ka light (power Minister) u kren tang shisien sha ki lad pathai khubor ia ka jinglip light la kum u ‘lur dih duma’. U Revenue Minister bad I Home Minister kim nud saham tang shi kyntien ruh halor ka hok longtrai ka jaid bynriew halor ka khyndew ka shyiap bad ka jaka ka puta.
Baroh la leh hi da u patsha (Chief Minister) jong ka Meghalaya kumba khot ne ong I MLA ka Nongthymmai Bah Jemino Mawthoh. Hynrei, watla katta ruh, ngim pat duh jingkyrmen satia. Ki don ki khun samla ka ri, ki sengbhalang ba shisha, ki bor pyniaid shnong pyniaid Hima bad wat ki seng sain hima sima (Regional Parties)kiba dang don shisha kata ka mynsiem kitkhia bad sngewkit khlieh na ka bynta ka ri bad ka jaidbynriew lajong, ban long ki nongiada ki nongiaker ban pha ban len lade ia ka ri bad ka jaidbynriew. U President ka Roosevelt ka America u la ong, “wat ju khmih lynti aiu ka ri kan leh na ka bynta jong phi, hynrei aiu phin leh na ka bynta jong ka”. Kynmaw para ri, “kane ka dei ka ri jong ngi ka ri um snam u kpa u Kni”.Da u Babu Kular Khongjirem.
