Shillong, Naiwieng 30: Ka Dorbar Grand Council of Chiefs (kaba kynthup ia Ka Dorbar Ki Khlieh Nongsynshar Ka Ri Hynniewtrep, Federation of Khasi States, Ka Dorbar Ki Dolloi, Ki Sirdarship) kaba la ia kynduh por 11 baje mynstep, 29 tarik November 2103, ha office Dorbar ha Lumjingsuk, Madanryting, Shillong, ban ia kren halor ki kam kiba mih na ka jingiakynduh dang shen ia ki heh Sorkar ha Delhi kynthup ia u Shri. Rahul Gandhi, MP
Na ka liang u Bah John F Kharshiing, Bah John F Kharshiing, Chairman, The Grand Council of Chiefs of Meghalaya, Chairman, Ka Dorbar ki Khlieh Nongsynshar Ka Ri Hynniewtrep, bad Spokesperson, Federation of Khasi States, u la pynpaw ba ka la don ka jingiakynduh bad ka jingiakren bad ki bor Sorkar ha Delhi kaba la neh haduh palat lai kynta ban ia tai halor ka jingdawa jong ki Khlieh Nongsynshar halor ka Instrument of Accession bad ka Annexed Agreement, kaba 17 August 1948, kaba la dep pdiang bad mynjur da ka Sorkar India, bad ha katei ka jingiakren la mih bun ki jingiatai halor ka phang ban ai lad ia ki Khlieh Nongsynshar ban long ki dkhot hapoh District Council lane ba kin ioh ia la ka jong ka Federal Council/ Regional Council la ka jong kaban long hapoh ka District Council. U Bah John F Kharshiing, u la pynpaw ruh ba ki bor Sorkar Delhi, ha ki jingiakren ki la lyngoh ban tip ba kiba bun ki Hima/Elaka kim pat don ki Act lane ki Rule la jong.
U la pyntip ba ki bor Sorkar ha Delhi ki la kylli bun ki jingkylli halor ka iktiar jong ki Kur – ha ka synshar khadar bad la kylli hato don ne em kino kino ki Ain kiba batai halor ki ‘Kur’ ba la pynjari da ki bor District Council, na ka liang u Chairman ka Dorbar u la pyntip ha ki bor Sorkar ha Delhi ba haduh kine ki sngi ngi don tang ka ain kaba iadei bad ka rukom shim jait bad la ai kopy sha ki bor ha Delhi ia katei ka ain ‘The Khasi Hills Autonomous District (khasi social custom of Lineage ) Act 1997’ kaba la mynjur da u lat ha ka 25 tarik February, 2005’ bad ki Ain ki Rule jong ka Hima Nongstoin 2006 bad Hima Maharam 2009
Ha ka jingiakren halor ka dulir Instrument of Accession bad ka Annexed Agreement, kaba 17 August 1948, u Bah John F Kharshiing, Chairman, Ka Dorbar Ki Khlieh Nongsynshar Ka Ri Hynniewtrep, u la ai copy ia ki bor Sorkar ia ka ‘White Paper on Indian States’, bad u la ong ha ki bor ha Delhi ba wat hadien ba la ioh Sixth Schedule, bad ka Jylla la jong ki paidbah ki dang iai khih halor kiba bun ki bynta haduh kine ki sngi namar ba ka Sorkar India kam pat lah ban pyndep ia ki jingkular kumba la ia kut lyngba ka dulir Instrument of Accession bad ka Annexed Agreement, kaba 17 August 1948, bad la kyrpad ia ki bor Sorkar New Delhi ban shim khia ban pyndep ia kitei ki jingkular, khnang ba kan long ka stieh jingiada ia ki jaidbynriew rit paid.
Hadien ka jingiatai kaba sani bha ki Khlieh Nongsynshar ki la pynpaw ba ka Sorkar India ka dei ban pynrung ia ka IOA & AA hapoh ka Riti Synshar ka Ri India(Constitution of India), bad ba katkum ka Instrument of Accession and Annexed Agreement ki Hima /Elaka ki dei ban ioh ia la ka jong ka iing dorbar – ka Regional Council lane ka Federal Council kumba la tyrwa da ka Thirteen Schedule kaba thymmai, ha kaba ki nongmihkhmat nalor ki Khieh Nongsynshar, naduh Shnong, Raid bad Hima, kin don ruh kiba shah jied da ki paidbah katkum u pud u sam jong ki Hima.
Kiba la ia don lang bad kiba la ia kren ha katei ka Dorbar ki long u Paiem Niandro Syiemiong, President, Federation of Khasi States, Paiem Phrester Manik Syiemlieh, Vice-President Federation of Khasi States, Bah A Kurbar, Sirdar Marbisu, Bah Edward Kurbah, Secretary Hima Marbisu, Bah Tylli Myrthong, Secretary Hima Mawsynram, Bah M Warbah, Myntri Hima Khyrim, Lyngdoh Lawai, Hima Khyrim, Bah Ditarson Syiemlieh, Secretary, Hima Nongspung, Bah K Srikliwell Marthong, Basan, Hima Mawiang Syiemship, Bah KM Syiem, Sordar Smit, Bah B Pyngrope, Rangbah Shnong Nongrah, bad kiwei kiwei.(SP News)
