Shillong, K`Lyngkot 12: U heh nongialam jong ka seng kaikhlaw Garo National Liberation Army (GNLA) uba bat ia ka kyrdan Commander in Chief (C-in-C) jong ka seng u Sohan D Shira u la kynthoh da kaba ong, “ka jingdawa ia ka pisa kaba bun bha haduh T.5 Klur da ki nongialam jong ka kynhun A’chik National Volunteer Council (ANVC) ka long na ka bynta ka jingmyntoi shimet jong ki hi.
Shuh shuh u Sohan u la kynnoh ruh ba katei ka jingdawa pisa kaba heh bha jong ki nongongialam ka ANVC na ka sorkar ka long ruh na ka bynta ban pyniaid ia ka Autonomous District Council ha ka shi snem. Une u heh ka GNLA u la ong, “nga sngew ba kan long ka kabu ksiar na ka bynta ki nongialam jong ka ANVC ban thied ia ki kali rem dor bad tei ruh ia ki iingbangla ba heh”.
Shuh shuh u Sohan u la ong, ‘kum u nongialam barim jong ka ANVC, u sngewkmen shi katdei eh ba ka sien jam jong ka ANVC na ka bynta ban pynkhlain ia ki iktiar jong ka ADC ka la long kaba jop bad seisoh. Hynrei hadien ba la ialam ia ka Council na ka bynta shi snem kan long kaba pynioh jingmyntoi lada ka ANVC ka pynneh ia ka shongsuk shongshngain bad kam pynthut ia ka jingsngew jong ki paidbah da ki kyntien ba khor bad lada kam bat hi ha la ki kti ia ka bor bad ki kam ki jam jong ka Council”.
