New Delhi Jymmang 01: U Sushil Kumar Shinde, myntri kam poh iing jong ka sorkar pdeng mynta ka sngi u la pynlait paidbah ia ka jingthohkhana samari ia ka jingdon brew ha kane ka Ri India baroh kawei haka jingialang ba la pynlong da ka ophis General & Census Commissioner, India ha New Delhi mynta ka sngi.
Ha ka jingkren jong u myntri kam poh iing u Shinde u la pynpaw ia ka jingsngewkmen ka jong u ban iohi ba ka jingdon briew ha kane ka Ri India ka la hiar ha kaba ia nujor bad ki sem kiba la leitnoh, ha ka juh ka por u la ong ba ka jingkmen kaba kham khraw ka long ba ka jingkiew ha ka jingnang jingstad jong ki kynthei ka la kiew ha kine ki shiphew snem.
Ha kane ka sngi la pynkup burom ia u G. K. Pillai, u ba la long teng u Union Home Secretary jong ka Ri India namar ka jingtrei shitom, lem bad ka kynhun jong u ba la lah ban leh ia kane ka kam ha kaba la lah ban pynbna paidbah ia ka khana samari jong u snem 2011.
Katkum kane ka jingpynlait khubor jong ka sorkar pdeng lyngba ka tnad pathai khubor jong ka mynta ka sngi ka la pyni ba ka jingdon briew hakaneka ri India baroh kawei ka long 1.21 billion ngut bad ka jingkiew along tang 181.96 million ha kine ki 10 snem kiba la leit noh. Lada khien ha ka percentage ka long tang 17.7% ha kaba ia nujor bad kaba la dep kaba la poi sha ka 21.5%.
Na kane ka khana samari ka pyni ba 833.5 million ngut ki paidbah nongshong shnong ki don ha ki nongkyndong katba ha sor ka long tang 377.1 million bad kane ka pyni ba 2/3 naki nongshong shnong ki don ha ki nongkyndong.
Ha man ka shi kilo metter ka jingdon briew hakane ka ri India ka long 382 ngut, ka jingdon jong ki khynnah kiba naduh ka snem 0-haduh 6 ki long 163.8 million ngut bad kane ka pyni iaka jingkiew kaba 0.4% ha kine ki shiphew snem kiba la leit.
Kumba ka long mynta ha ka jingdon jong ki shynrang bad ki kynthei ha kane ka Ri India ka long ba man ka 1000 ngut ki shynrang ki don 943 ki kynthei. Ka jingdon jong ki kynthei ha kane ka ri ka la kiew ban ia nujor bad ka khana samari kaba la dep.
Ka jingdon jong ki rit paid ha kane ka Ri India ka la kiew na ka 166.i million sha ka 201.4 million ngut. Katba ki riewlum ki la kiew ha ka jingdon briew na ka 84.3 million sha ka 104.3 millon ngut. Ka jingnang jingstad ka la kiew ha kane ka ri India na ka 560.7 million ngut sha ka 763.5 million ngut katkum kane ka khana samari kaba thymmai. (SP News)
