Guwahati Nailar 05: Ka jingiakhih ban ioh ia ka jylla Bodo Land ha Assam shen kan sa ktah ia ka jingwan poi jong ki marbam bad ia ka ioh ka kot jong ki paidbah ka dong shatei lam mih ngi jong ka Ri India.
Ki seng bapher bapher kum ka All Bodo Students Union, ka Koch Rajbonshi organisations bad ki seng na Ksrbi-anglong districts kiba la khot ia ka pakhang shnong na naduh ka 31 tarik jong u Naitung ba la dep da kaba khang lynti ia ki rel kiba wan sha kane ka thain ban dawa ban ioh jylla la ka jong.
Ka seng UDPF ka la khang ia ka pakhang shnong kaba 1500 kynta bad kane ka long ka jingkhot pakhang shnong kaba jrong tam haduh mynta, ka KPLT kala khot pakhang shnong 300 kynta, 48 kynta la khot da ka ABSU, bad 36 kynta la khot da ka AKRASU.
Da kane ka jingkhot ia kine ki pakhang shnong kiba bun spah kynta kan ktah ia ka jingwan poi jong ki marbam ha kane ka dong shatei lam mih ngi jong ka Ri India namar ba baroh ki rel kiba wan sha kane ka thainkihap ban iaid lyngba jong ka Kokrajhar district, kaba hap hapoh jong ka Bodo land Territorial.
“ Ngi la kyrpad ia ki nongkhot ia ki jingiakhih da lade khamtam ia ki nongialam jong ki Bodo bad Koch Rajbonshi ba kin pynlait ia ki rel kiba wan sha kane ka thain hynrei kumba ka long haduh mynta kam shym don kano kano ka jubab na kine ki nongkhot pakhang shnong” la ong u Rupam Goswami, Chairman jong ka Assam Cahmber of Commerce. Lada kane ka jingiakhih ka bteng kumba ka long mynta kan long kaba eh ban ioh ia u khaw bad ia u dai ha ki iew ki hat, kane kan long ka jingeh ia ki paidbah.
“ Kan don ka jingthut ia ki paidbah hynrei ngim lah ban leh ei ei” la ong u Longti Timung, president ka seng Guwahati Karbi Student Association, u tei u nongialam u la ong ba kane ka jingiakhih ka jong ngi kan iai bteng lada ngim lah ban ioh ia ka jingdawa jylla la ka jong.” La ban biang u Longti Timung.
U nongai ktin jong ka tnad pyniaid Rel ha North East u Jayanta Bhattacharya u la ong ba ha kine ki sawphew sngi kiba la leit noh ka la don ka jingktah ia ka jingleit jingwan jong ki rel bad bun na ki la hap ban pynpep noh ia ka jingiaid jong ki bad kumba ka long mynta ki rel kiba pyniaid ki dei kiba la pynbiang ia ki nongpahara ha ki bynta jong ka Kokrajhar.(SP News)
