Shillong, Jylliew 15: U lat ka jylla Meghalaya U R S Mooshahary mynta ka sngi u ala pynlait paidbah ia ka kot kaba la thoh da u Bah J Kerrsing Tariang uba dei u wei na ki riew rangbah ka seng khasi ia kaba la ai kyrteng “The Philosophy and Essence of Niam Khasi “. Ia kane ka kot la pynlait ha seng khasi college Jaiaw.
Ha ka jingkren jong u lat ka jylla u la ong ba u ai ka jingiaroh ia ka niam khasi wat la ka don ka jingpyniapher ha ka jingtrei kam hynrei kam don pat ia ka jingpher jaid baroh ki long kumjuh, ha kaba u khun jong u nong shoh wait u lah long u scientist bad u khun nong bylla u lah ban long u engineer.
U Lat u la ong ba ka niam ka long ban hikai ia u briew ban leh ia kaei kaei kaba bha,ha kip or hyndai ki briew ki kylli balei ki don ha kane ka sla pyrthei, na ei ki wan bad sha ei kin leit . Ki khasi ki gneit ba ki dei ki khun jong u blei, dei na kane ka daw ba ka mih ka ktien kaba ong “ Tip Briew Tip Blei”.
Na ka liang jong u lat u la kyntu ba dei ban peit bniah ia lade bad dei ban pynphriang ia ka khubor jong ka jingsuk. U la ong ba baroh ki jaid niam ha ka pyrthei ki ngiet ia ka jingdon u wei u blei, wat la ki mane ia u ha ki dur bapher bapher, kaba kongsan ha ka jingim briew ka long ban ioh ia ka jingsuk ha ka jingmud jingpyrkhat.
Ha ka juh ka por u lat u la kdew ba wat hapdeng kine ki jinghikai kiba bha na ki jaid niam baroh, balei pat ka mih ka jingbymshong suk bad ki kam sniew kiba laiphew jaid. Ha ka jinglong khasi ruh ki don jingngeit biej hynrei kaba I tynnad ka long ba ka don pat ka jinglait luid ha kaba u briew un jied.
Na ka liang jong u Lat u la ong ba ka niam kadei tang shibynta na ka kolshor jong u briew, hynrei kaba sngewsih ka long ba ki don pat ki jaid niam kiba hikai bakla ban pynrung ha ka jingmud jong u briew ba dei tang kaba ki hikai ma ki ka long kaba dei ia kaba la tip kum ka “Fanaticism” ha ka ktien nongwei lane kata ka buid niam.(SP News)
