Shillong, Nailar 06: Ka jingkwah ban phiah ia ki District Council Constituencies ha ki lai tylli ki District Council ha ka jylla ka don hapdeng ka umdum bad ka sah lyngdoh namar kane ka election ka la jan palat kaba sah mynta sa tang khyndait bnai.
Ka election sha ki lai tylli ki iing dorbar jong ki District Council ha ka jylla, ka Khasi Hills Autonomous District Council, ka Garo Hills Autonomous District Council bad ka e Jiantia Hills Autonomous District Council ki la dep pass ha ki iing dorbar jong ki bad la dep phah sha ka tand DC(A) jong ka sorkar jylla.
Hynrei ha ka jingialang kaba dang shen hapdeng ki lai ngut ki CEM jong ki District Council bad u myntri ba dei peit ia ka DC(A) u Bah HDR Lyngdoh ka la paw ba baroh ki bill kiba la pass kin nym lah ban long ain.
Ki thymmei khubor kiba ia jan bad ka DC(A) ki pynsngew ba kane ka jingkwah ban wan rah ia ka jingpynphiah ia ki constituency ha ki District Council ka la long jan palat bad ka election, kan long kaba eh ban pynbeit la pynlong ia ka election kumba ka long mynta.
Tang kawei ka lad, kata ka long ba lada kwah ban phiah ia ki constituency jong ki MDC ka long sa tang ban pynjlan ia ka por ia ka iing dorbar jong kine ki lait tylli ki district kiba mynta.
Kumba ka long mynta ka dang don ha ka umdum bad ka sah lyngngoh ym tang ia ki paidbah hynrei wat ia ki MDC kiba mynta bad ia kito kiba la pynkhreh ban ia khun ia ka MDC election kaban long ha sdang snem jong u 2014.(SP News)
