Shillong, Naiwieng 03: Ka jingleit bar ri jong u myntri rangbah ka jylla, na ka liang jong ki 14 tylli ki seng bhalang ki la kynnoh ba kane ka jingleit ka kren ba u Dr Mukul Sangma um shym la shimkhai ia kane ka ka kam mynder ri, kane ka long katkum ka khubor kaba la pynlait da u president jong ka KSU u Bah Daniel.
Na ka liang jong u tei u nongialam jong ka KSU u la ong ba ha ka jingshisha na ka liang jong u myntri rangbah u la dei ban don hapoh ka jylla ban pynbeit ia kine ki jingeh kiba ka jylla ka don mynta.
Haba ia dei bad ka “Eastern Bengal Frontier Act, 1873” na ka liang jong ki seng bhalang ki ong ba ka sorkar ka ialam bakla ia ki paidbah ban ong la pynkylla ia katei ka ain ha kaba ia dei bad ki bynta jong ka Garo Hills. Haba ki pan ia ki jignthoh ka sorkar kam shym la lahb an ai, kane ka jingbym lah jong ka sorkar ban sei ia ki jingshisha ka kren shai ba ka ain ka dang don ha kane ka jylla.
Halor ka jingkynnoh jong u myntri rangbah ba ki sengbhalang ki long kum ki lehnoh ha kaba ia dei bad ka jigdawa jong ki seng bhalang, ia kane ka jingong ki seng bhalang ki pynrem jur. U Bah Daniel u la ong ba ki seng bhalang kim don tiar sait ban pyndem ha khmat ka sorkar, hynrei ki pyndon kam ia ka hok jong ki kaba la ai ha ka riti synshar jong ka Ri India ban dawa ia ka hok, namar ka dei ka kamram jong ka sorkar jylla kumba ki la smai ban iada.
Ban bteng ia kane ka jingiakhih ka jong ki ban dawa na ka sorkar ba ka dei ban pyntrei kam noh ia ka ILP ha kane ka jylla ki la khot biang ia ka pakhang surok miet naduh ka 5 tarik haduh ka 7 tarik mynta u bnai, naduh ka por 8 baje mynmiet haduh ka por 5 aje mynstep. Ha ka juh ka por la kyrpang ia ki paidbah ba kin iai bteng ia ka jingkyrshan ka jong ki ha kane ka jingdawa ban ioh ia ka jingiada ia ka jaid bynriew rit paid.(SP News)
