Jowai, Naiwieng 22: Hadien ka jingpynrem jong ka KSU Myntriang Unit ia ka jingpyntreikam sop sop bad thur mur jong u ma W. Lamurong, Rangbah Shnong bad uba long ruh u secretary ka VEC jong ka shnong Myntriang ia ka NREGS bad khamtam ia ka jingpynbna ban pyntrei NREGS hapoh iingmane. Mynnin ka sngi (22/11/2013), ka Dorbar shnong ka la rai ban pyntrei noh ia ka ‘Work order’ ba dang ioh da ka jingiatiplang jong baroh ki nongshong shnong naduh ka 02/12/2013. “Nangne sha khmat, Ngi khmih lynti ba ka jingpyntrei kam thur mur ia ka NREGS bad kiwei de ki skhim jong ki paidbah kan iaid da ka jingiatiplem/sngewthuh bad ka jingioh bynta lang jong ki nongshong shnong baroh kawei ym da kaba leh marwei marwei kum ha kine ki sngi ba la dep”, la pynpaw u ma C. Lamurong, uba long u Vice President ka KSU Myntriang Unit.
Kaba pynlyngngoh ia kiba bun ki nongshong shnong bad khamtam ia ka seng ka long ia ka jingshim rai jubor jong ki katto katne ki rangbah ban pyrshah bad ai jingujorpyrshah ia ka seng namar ba kala pan RTI ia ki jingpyntrei kam ia ka NREGS, na Saipung Block, ha ki snem ba la dep naduh u snem 2009 haduh shwa ka work order ba mut pyntrei mynta. “Ka seng ka dap pat da ka jingsngewkhia ia ka jingialam bakla jong ki katto katne ki rangbah ia ki khun jong ka shnong halor ka rai ban ujor ia ka Jingpan RTI ka seng na Block kaba lah ban ai ki jingtip kiba bniah halor ka jingpyntrei ia ka NREGS hapoh shnong. Ha ka jaka ba kitei ki rangbah kin ailad ia ki nongshong shnong ban ia mir jingmut halor ka RTI ne ka jingthmu ba la pan ia ka na Block, kitei ki rangbah ki la shim rai jubor ba ki paidbah ki pyrshah ia ka RTI ba pan ka seng ”, la pynpaw u Samla Iamon Lapasam uba long u president ka Unit.
Ka seng kan ym weng ia ka RTI ba ka la buh ha Saipung Block bad kan pynpaw ia ki jingshisha baroh halor ka jing pyntreikam ia ka NREGS hapoh shnong Myntriang naduh ki snem 2009 bad haduh mynta. Halor kane ka jingpan RTI bad ka jingiasaid, ka KSU Laskein Circle ka ai ka jingkyrshan ba pura ia ka KSU Myntriang Unit bad kan ieng ryngkat bad ka Unit ha ki kam jong ki baroh.(SP News)
