Tura, Rymphang 21: U myntri rangbah ka jylla u Dr Mukul Sangma ha ka jingkren ka jong u haka jingialang paidbah ha Tura ha kaba plie ia ka jinghikai wad ioh kam ioh jam u la ong ba ka jingrung kam lehnoh jong ki samla ka dei na ka jingbym don kam bad ka jingkwah ban ioh pisa da kaba suk khlem da trei shitom.
U Myntri rangbah u la ong ba kane ka sorkar ka jong u mynta ka wad ki lad ki lynti kumno ban pynioh kam ioh jam ia ki samla lyngba jong ka Chief Minister employment scheme. U la ong ba ki kam sorkar kila tyrkhong mynta bad ka lad ka don sa ha kiwei ki lad ioh kam ioh jam ki bym dei jong ka sorkar.
U la ong ba kumba ka long mynta palat 200 ngut ki samla na West bad South West Garo Hills kila ioh ban rung kam ha dien ba ki la pyndep ia ka jinghikai security guards. Ka sorkar Meghalaya mynta kan ai jinghikai na ka bynta ban pynlong ia ki samla kiba lah ban ioh kam ha kiwei ki jylla.
Ka sorkar kan ialeh ban pynkiew ia ka jingpynlut pisa ha ka kam hikai, kumba ka long mynta artylli ki medical colleges kin don ha kane ka jylla ha ka jingiatreilang bad ki riew shimet bad ka sorkar ka kwah ban pyni ba ka jylla Meghalaya ka dei ka pdeng jong ka jingnang jingstad.
U la ong ba ka sorkar mynta kala pyntung ia ka jinghikai ha ki skul ha kaba ia dei bad ka information technology education ha baroh ki skul jong ka sorkar da kaba pynioh ia ki Wi-Fi.
Kane ka jinghikai kan iarap ia ki paidbah ban tip bad kan pynlong ia ki briew ba kin nym phet na nongkyndong sha ki jaka sor. Kane kan wan rah ia ka jingkylla ha kiba bun ki liang ha ki por kiban sa wan, la ong u Dr Mukul myntri rangbah ka jylla.(SP News)
