New Delhi Jylliew 05: U myntri rangbah duh jong ka Ri India u Dr Manmohan Sing haba kren ha ka jingialang jong ki myntri rangbah jong ki jylla kane ka ri halor ka phang ka shong suk shong sain ha ka Ri, u la kdew ba ka jinglong jingman ha ka shong suk shongsain ha ka dong shatei lam mih ngi jong ka Ri India ka dang long kyllain. Ka daw ka long ba ki kam lehnoh, ki jingiakhih ki long ki jingpynthud ha ka imlang sahlang bad kumba ka long ka dang don ha ki kti jong ki lehnoh.
Haka juh ka por u la ong ba ki jingiakren ia suk bad ki seng lehnoh kiba na kane ka thian ki dang iai bteng. Ka la don ruh ka jingiasoi ia ka soskular iasuk bad ki lehnoh Dima Halam Daogah of Dima Hasao jng ka Assam. Ki don lai tylli ki seng lehnoh na ka kynhun Metei kiba la ia soi ia ka soskular ia suk mynta u snem bad ka jingiakren ia suk bad ka seng lehnoh National Socialist Council of Nagaland ka dang iai bteng.
Na ka liang jong ka sorkar pdeng ka dang plie ia ka jingkhang ban ia kren ia suk bad baroh ki seng lehnoh bad kino kino ki seng lada ki kloi ban sangehnoh ia ki kam pyntriem jong ki ban wanrah ia ka shong suk shong sain ha ka dong shatei lam mih ngi jong ka Ri India bad kata ka jingiakren kan long hapoh ka riti synshar jong ka Ri India.
Na ka liang jong ka sorkar pdeng kan dang iai bteng ban ai ia ki jingkyrshan ia ki jylla jong ka dong shatei lam mih ngi jong ka Ri India ban wanrah ia ka shong suk shongsain khnang ba ki paidbah nongshong shnong kin ioh kheit ia u soh jong ka synshar paidbah kaba pura ha baroh ki liang khamtam eh ha ka liang jong ka ioh ka kot, ong kaba kyrwoh kaba la phah da ka lad pathai khubor jong ka sorkar pdeng ka PIB.(SP News)
