Shillong, 29 Risaw: Baroh ki sorkar kiba la leit bad kane ka sorkar kaba mynta kila leh kmie nah ha kaba ia dei bad ka ktien sohra ne ka ktien khasi kaba ngi pyndon kam ha ka thoh katar bad ka pule puthi, hynrei wat la ka jingpule ia kane ka ktien ka la rung hapoh jong ka skul bah jong ka sorkar pdeng ka North Eastern Hills University (NEHU) hynrei ia ka jingpynbeit ryntih ia ka jingspel ia ka ktien khasi haduh mynta ym pat lah ban leh namar ka sorkar Meghalaya ka salia ban thaw ia ka State Sabha Akademi kumba la bthah da ka Sahitya Akademi.
U babu S S Majaw, ha ka jingiakren bad u SP News Agency, u la kren shai kdar ba ka dei ka jinghisha ba haduh mynta ym pat lah ban pynbeit ryntih ia ka jingspel ia ki dak khasi, ka thymmei ba kongsan eh kaba la wanrah ia kane ka jingeh u la kynnoh ba dei na ka jingleh bym suid niew jong ka sorkar jylla namar ba kam shym treh ban thaw ia ka State Sabha Akademi, katkum ka jingbthah jong ka Sahitya Akademi kaba dei peit ia ka jingspel dak ia ki ktien ha ka ri India.
Kiwei pat ki daw kiba la bynrap shuh shuh ban wanrah ia kane ka jingeh ban pynbeit ia ka jingspel dak ka dei ba baroh ki nongthoh kot khasi wat la ki don hapoh jong ka Khasi Author Society, hynrei ki don pat ka jingiapher jingmud para maki. Ka jingdon ia ka Khasi Department hapoh jong ka skul bah NEHU kane ruh kala dang pynklumar ia ka rukom spel dak namar ia ka sobjek linguistic ka dei kaba la shu wanrah na shabar.
U babu Majaw, u la ong ruh ba kumba ka long mynta ki don lai tylli ki rukom pyrkhat ha kaba thoh ia ka ktien khasi, ne kata ka “school of thought” kaba ki ong ha ka ktien nongwei, kawei ka dei ka Presbyterian School of thought ka Seng khasi School of thought bad ka Catholic School of thought. Kine ki lai tylli ki kynhun kiba don la ka jong ka jong ka jingpyrkhat ha ka rukom spel dak haduh mynta kim pat juh don kata ka jingiakynduh lang ban ia mir jingmud ne ban pynbor ia ka sorkar ba ka dei ban thawnoh ia ka State Sabha Akademi.
Ban pynbeit ia ka jingspel dak ym don mano mano ba don ia ka bor ban leh, hynrei dei tang ka State Sabha Akademi ha ka jylla. Kiwei ki jylla ha ka Ri India ki don ia kane ka State Sabha Akademi dei na kata kadaw ba ha ka ri India baroh kawei ki jaid ktien kiba la ithuh ba ka jingspel dak jong ki ka long kaba beit ha kaba yn nym don shuh ban ialam bakla ki don arphew saw tylli ki ktien.
U Babu Majaw, u ai ka jingiaroh ia u myntri rangbah ba rim ka jylla u Bah DD Lapang u ba la wanrah ia ka Bill hapoh ka iing dorbar thawain ka jylla ha u snem 2005 ha kaba la lah ban pynlong ia ka ktien Khasi bad Garo kum ki ktien Associate Official Language ha ki District. Hynrei kaba sngewsih pat ban tip ba ia kane ka jingpynbna sorkar ym shym pat phah sha ka Sahitya Akademi bad sha ka sorkar pdeng.
Ha ka por ba u Babu Majaw u dang bat ia ka kam president jong ka KAS, ka la thoh sha ka KSU bad sha kiwei ki seng bhalang ban ia treilang ban kyntu ia ka sorkar ba kan thaw ia ka State Sabha Akademi hynrei ym don ba patiaw, ban kren lei ia ki nongmih khmat kam don jingmyntoi, la ong u babu Majaw, u la ai ka jingiaroh ia u MLA bakla bam kwai ha dwar u blei u Adendhu Choudhury u ba kren shaphang ka ktien khasi hapoh Assembly.
Na ka liang jong u Babu u la kren kdiaw ba kane ka jingleh jong ka sorkar ka ktah ia ki khynnah skul haduh kiba la pule ha ki skul bah. Ka por kala dei eh ba ka State Sabha Akademi ban pynbeit ia ka jingspel dak ia ka ktien khasi. Na ka liang jong ka sorkar ka kwah ban pynlong ia ka State Sabha Akademi tang kum kawei ka phngiat trei kam jong ka tand Art and Culture. Katba ka jingbthah jong ka Sahitya Akademi ka long ba ka State Sabha Akademi ka dei ban long ka autonomous body. (SP News)
